पोखरा ।

सिमसिमे वर्षा भइरहेका बेला पोखरा सभागृहभित्र आज बिहानैदेखि नयाँ पुस्ता जेनजीले स्वतस्फूर्त रुपमा प्रदर्शन थालेका छन् । उनीहरुले सरकारद्वारा सामाजिक सञ्जाल बन्द गर्ने निर्णयदेखि नेताहरुको भ्रस्टाचारसम्मका विषयमा आवाज उठाएका छन् ।

१० बजेबाट सुरु भएको प्रदर्शनमा सहभागी संख्या क्रमशः बढ्दै गएको छ । पोखराका विभिन्न स्थानबाट आएका युवाहरु सभागृहमा भेला भएर नेताहरुले भ्रस्टाचारमा रमाइरहेका तर सामान्य नागरिकले पीडा भोग्नुपर्ने अवस्थाप्रति आक्रोस व्यक्त गरेका छन् ।

प्रदर्शनमा सहभागीले ‘जनता जति खाडीमा, तिमी चाहिँ गाडीमा, रोलेक्स घडी नाडीमा’, ‘दुःखी जनता कमाउने, भ्रस्ट नेता रमाउने’, ‘जनताको आवाज दबाएर स्वतन्त्रता बन्द गर्न पाइँदैन’, ‘भ्रस्ट नेता होसियार’ जस्ता नारा लगाए । केहीले प्रधानमन्त्री केपी शर्मा ओलीको नामसहित नाराबाजी गरे भने केही युवाले नेताको नाम नलिने आग्रह गर्दै प्रदर्शनलाई भड्किन नदिने काम गरेका छन् ।

रेनकोट लगाएका युवाहरुले नेपालको झण्डा बोकेका छन् र पम्लेट बाँड्दै प्रदर्शनमा उत्रिएका छन् । उनीहरुले कर तिरेर नागरिकले दुःख भोगिरहेका तर नेताहरु र तिनका परिवारले ऐयासी जीवन बिताइरहेको भन्दै आपत्ति जनाए ।