समाधान संवाददाता
पोखरा

पोखरा सडक महोत्सवमा भएकोे डुंगा दौड प्रतियोगितामा फिस्टेल घाट पहिलो भएको छ । फिस्टेल घाटबाट सहभागी दीपेन्द्र परियार, आशीष परियार र अमिस परियारले पहिलो हुँदै नगद २० हजार र प्रमाणपत्र पाए ।

बाराही घाट ईबाट सहभागी दिपेश परियार, पूर्ण मगर र जीवन मगरको समूहले दोस्रो भएर नगद १० हजार र प्रमाणपत्र पायो । बाराहीघाट डिबाट केवल चौधरी, लेख माझी र गणेश माझीले तेस्रो हुँदै ५ हजार जिते । गौरीघाट समूहबाट गौतम भुजेल, सुवास सुवेदी र अमृत नेपाली सान्त्वना भए । उनीहरुले नगद २ हजार जिते ।

प्रतियोगितामा ११ टिमको सहभागीता थियो । विजेतालाई गण्डकी प्रदेशका सांसद इन्द्रधारा विष्ट, रेबान पोखरा अध्यक्ष भीमसेन भुजेल, महोत्सवका संयोजक लक्ष्मण बराल, पूर्व अध्यक्ष चौबहादुर गुरुङ, महोत्वसका सहसंयोजक वसन्त गौतम लगायतले पुरस्कार वितरण गरे ।

रेबानले आयोजना गरेको २१ औं पोखरा सडक महोत्सव जारी छ । पोखरा लेकसाइडको ३ किलोमिटर क्षेत्रमा भएको मेला हर्न आउने दर्शक बढेका छन् । आइतबार दिउँसो पोखराका कोमागाने पार्कमा राष्ट्रिय लोकदोहोरी कलाकारको प्रस्तुतिमा दर्शक रमेको सडक महोत्सव संयोजक लक्ष्मण बरालले जानकारी दिए । आइतबार लोकदोहोरीतर्फ देवी घर्ती, सरला पाण्डे, मञ्जु विक, दुर्गा क्षेत्री, बद्री पगेनी, जीवन दाहाल, श्रीराम अधिकारी र घनश्याम रिजालले मनोरञ्जन दिए । हास्य कलाकार सापटे र भटभटेले दर्शकलाई हसाए ।

लाइभ कन्सर्टतर्फ अभय एन्ड द स्टिम इन्जिनको प्रस्तुति रह्यो । सोमबार लोकदोहोरीतर्फ प्रिती आले, निशा पोख्रेल, सीता परियार, कमला ग्रैहे, वसन्त थापा, शंकरविरही गुरुङ, सुरेन्द्र गुरुङ र रामजी पौडेलको प्रस्तुति रहनेछ । हास्य कलाकारतर्फ युवराज भण्डारी, राजेन्द्र नेपाली र मनोज गजुरेल आकर्षण छन् । साँझ लाइभ कन्सर्टमा सबिन राई आउने छन् ।