एसके थकाली
जोमसोम

बेनी–जोमसोम सडकमा टाइम कार्ड लागु भएको छ । सडक निर्माणलाई गति दिन जोमसोम जाने ७६ किमी सडकमा टाइमकाड लगाइएको हो । बेनी–जोमसोम निर्माणाधीन सडकमा मंसिर मसान्तदेखि २ महिनाका लागि टाइम कार्ड लगाइएको करिडोरले जनाएको छ ।

टाइमकार्डले मुस्ताङ आउजाउ गर्ने सवारी र यात्रुलाई सास्ती भएको छ । बेनी–जोमसोम सडकमा दैनिक ४ घण्टा फरकमा २ पटक सवारी आवागमनको व्यवस्था मिलाइएको आयोजना प्रमुख मुकुन्द अधिकारीले जानकारी दिए । करिडोरले म्याग्दीको तातोपानीदेखि मुस्ताङको लेतेसम्म बिहान साढे ७ बजेदेखि साढे ११ बजे र दिउँसो साढे २ बजेदेखि साँझ ६ बजेसम्म टाइमकार्ड लगाएको हो ।

टाइमकार्ड छल्न पोखरा र जोमसोमबाट दोहोर आउजाऊ गर्ने सवारी साधनले बिहानै छुट्नुपर्ने बाध्यता भएको छ । टाइम कार्डले सवारी छुटेमा घण्टौंसम्म सडकमै रोकिएर बस्नुपर्ने अवस्था आएको सवारी चालक कृष्णमोहन नेपालीले बताए । कालिगण्डकी करिडोरको उत्तरी कोरलानाका जोड्ने बेनी–जोमसोम सडक खण्डको म्याग्दीतर्फ प्याकेज १ र २ , मुस्ताङतर्फ प्याकेज ३ मा सडकको काम भइरहेको छ ।

म्याग्दीतर्फ प्याकेज १ मा सडक तटबन्ध लगाउने, सडक फराकिलो पार्ने, कल्भर्ट निर्माण गर्ने र गे्रड सम्याउने लगायतका काम भएको छ भने प्याकेज २ म्याग्दी र प्याकेज ३ घासादेखि खन्तीसम्म रक कटिङ भइरहेको छ । प्याकेज ४ खन्तीदेखि जोमसोमको खण्डमा पनि रक कटिङ हुँदै छ । उक्त खण्डको काम शर्मा गजुरमुखी र सप्तकोशी एन्ड जलाधार कन्ट्रक्सनले जिम्मा लिएको छ । बेनी–जोमसोम सडकमा ४ खण्डमा काम भइरहेको छ । बेनी –जोमसोम सडकको म्याद मंसिरमा सकिइसकेकाले आउँदो जेठ मसान्तसम्म म्याद थप्ने गरी प्रक्रिया अघि बढेको आयोजना प्रमुख अधिकारीले बताए ।

उनले सार्वजनिक खरिद ऐन परिमार्जन भइसकेकाले ऐन÷नियमको परिधिमा रहेर म्याद थप हुने उल्लेख गरे । यसअघि जोमसोम कोरला १ सय १० किमी ग्राभेल सडकको २ पटक म्याद थपिएको छ । उक्त सडकको आगामी असारमा म्याद सकिँदै छ ।

करिडोरका अनुसार बेनी जोमसोम सडकमा हालसम्म ५० प्रतिशत र जोमसोम कोरला सडकमा ८० प्रतिशत काम भएको छ । बर्खायामको मौसममा म्याग्दी खण्डमा बाढी, पहिरो जाने र निर्माण कम्पनीको सुस्तताले अपेक्षा गरे अनुसार काममा प्रगति हुन नसकेको आयोजना प्रमुख अधिकारीले खुलाए । हिउँद याममा मुस्ताङ आउजाउ गर्ने यात्रु वाहक सवारी साधनको चाप कम हुने भएको र कामलाई गति दिनुपर्ने भएकाले हिउँद याममै टाइमकार्ड लगाएर कामअघि बढाइएको उल्लेख गरे । उनले भने, ‘चाडै काम सक्नुपर्ने चुनौती छ । ट्राफिक जाम कम हुने समय पनि यही हो । मौसम अनुकूल मिलाएर म्याग्दी र तल्लो मुस्ताङ खण्डमा कामलाई गति दिने प्रयास गरेका छौं ।’