लेखनाथ ।
कास्कीको लेखनाथमा करिब १ करोड रुपैयाँ लागतको सभाहल उद्घाटन गरिएको छ । संघीय सरकारको लगानीमा ङयोए तमु धिमा निर्मित उक्त भवनको बिहीबार उदघाटन गरियो । पूर्वसांसद मनबहादुर गुरुङले भवनको औपचारिक शुभारम्भ गरे । ङयोए तमु धि लेखनाथले सञ्चालन गरेको ल्होसार विशेष समारोहमा भवन उद्घाटन भएको हो ।

तमु समुदायले यसपालि सर्प वर्ग (सप्री ल्हो) लाई बिदाइ गरेका छन् । उनीहरूले घोडा वर्ग (त ल्हो) को स्वागत गर्दै यो पर्व मनाएका हुन् । देशभरि नै यो पर्व धुमधामसाथ मनाइँदै छ ।

भवन उदघाटनपछि बोल्दै गुरुङले ल्होसारलाई सिक्ने र सिकाउने पर्वका रूपमा अथ्र्याए । उनले यो पर्व गुरुङ जातिको मात्र नभएको बताए । ल्होसार अब सबै जातजाति र वर्गको साझा भएको उनको भनाइ छ । उनले भने, ‘यो पर्व नेपाल र नेपालीको मौलिक संस्कृतिसँग जोडिएको छ । त्यसैले यो आम नेपालीको सामूहिक पर्व हो ।’

पूर्वसांसद गुरुङले ल्होसार फेरिएको नयाँ वर्गको स्वागत र पुरानोको बिदाइ भएको उल्लेख गरे । उनले यो प्रकृति र मानव जीवनशैलीमा आधारित १२ वटा वर्गको चक्र भएको प्रस्ट पारे । बालबालिकालाई यसतर्फ आकर्षित गर्नुपर्नेमा उनको जोड थियो । उनले भने, ‘यस पर्वमा लुकेर रहेको प्रतिभा प्रस्फुटन हुन्छ । कला, गला, ज्ञान र सीपको कदर गरिन्छ । त्यसैले साना बाबुनानीहरूलाई यसतर्फ अग्रसर गराउनुपर्छ ।’

कार्यक्रममा पोखरा महानगरपालिका वडा नम्बर २७ का वडाध्यक्ष पूर्णकुमार गुरुङले संस्कृतिको महत्त्वबारे बोले । उनले तमु समुदायको मौलिक संस्कृति, भेषभूषा र भाषा संरक्षण गर्नुपर्ने बताए । यसका लागि संग्रहालय आवश्यक भए पनि घरबाटै सुरुआत गर्न उनले सुझाव दिए ।

तमु धि कास्कीका अध्यक्ष होम गुरुङले नेपाली संस्कृति विश्वमा चिनिएको बताए । उनले मौलिक संस्कृति जोगाउन यस्ता पर्वको महत्त्व बढेको उल्लेख गरे । उनले यसलाई राष्ट्रिय पर्वकै रूपमा मनाउनुपर्नेमा जोड दिए । आदिवासी जनजाति महासंघ गण्डकी प्रदेशकी अध्यक्ष खिमा गुरुङले पनि धारणा राखिन् । ल्होसारले नयाँ जोस र उत्साह दिने उनले बताइन् । विगतका कमजोरी सच्याउँदै अघि बढ्ने प्रेरणा ल्होसारबाट मिल्ने उनको भनाइ थियो ।

ङयोए तमु धि लेखनाथका अध्यक्ष मेजर रामप्रसाद गुरुङले कार्यक्रममा स्वागत मन्तव्य राखे । उनले सांस्कृतिक परम्पराको संरक्षण गर्नु सबैको कर्तव्य भएको बताए । कार्यक्रम विविध सांस्कृतिक प्रस्तुतिसहित सुरु भएको थियो ।

समारोहमा लेखनाथ उद्योग वाणिज्य संघकी अध्यक्ष जानुका अधिकारी पराजुली र गुरुङ राष्ट्रिय परिषद कास्कीकी अध्यक्ष सीता गुरुङ सहभागी थिए । पच्यु गुरु चुनबहादुर गुरुङ लगायतले पनि शुभकामना दिए । उनीहरूले ल्होसारले आपसी सद्भाव र सहिष्णुता बढाउने विश्वास व्यक्त गरे । यसले राष्ट्रिय एकता सुदृढ गर्ने उनीहरूको भनाइ थियो । कार्यक्रमको अध्यक्षता मेजर रामप्रसाद गुरुङले गरेका थिए । सचिव राजु गुरुङले कार्यक्रम सञ्चालन गरेका थिए । उपाध्यक्ष मेघबहादुर गुरुङले धन्यवाद ज्ञापन गरे ।