लेखनाथ ।
पोखरा महानगरपालिका वडा नं. ३० पावरहाउसमा रहेको जनता बचत तथा ऋण सहकारी संस्था लिमिटेडको १४ औं वार्षिकोत्सवको अवसरमा आयोजित रक्तदानमा ४६ पिन्ट रगत संकलन भएको छ । गण्डकी विश्वविद्यालयका कुलपति प्राडा ईन्द्रप्रसाद तिवारीले सहकारीका उपाध्यक्ष सनबहादुर गुरुङलाई बल्ड ब्याग हस्तान्तरण गर्दै रक्तदान सुरुआत गरे ।

सहकारीका अध्यक्ष भरत ओझाको अध्यक्षतामा भएको कार्यक्रममा तिवारीले कास्की जिल्लामा रगतको अभाव हुन नदिन सहकारीले नियमित रूपमा यस्तो कार्यक्रम सञ्चालन गर्नु सराहनीय रहेको बताए । उनले साविक लेखनाथ क्षेत्रमा २०३९ सालमा लामास्वाराबाट सुरु भएको रक्तदान अभियान अहिले व्यापक बनेको बताए ।

सहकारीका संस्थापक अध्यक्ष विश्वमोहन पौडेलले सहकारी स्थापना भएदेखि नै रक्तदान कार्यक्रम सञ्चालन हुँदै आएको जानकारी दिँदै निःस्वार्थ रूपमा रक्तदान गर्न सबै सदस्यलाई आग्रह गरे । कार्यक्रममा संस्थाका पूर्वअध्यक्ष शोभामोहन पौडेल, कूलबहादुर रानाभाट, निर्वतमान अध्यक्ष विश्वराज लामिछाने, रक्त सञ्चार केन्द्र पोखराका प्रमुख अर्जुन ज्ञावाली, कोषाध्यक्ष दयाराज भण्डारी, सदस्य पदमराज पौडेल, उपाध्यक्ष सनबहादुर गुरुङ लगायतले बोलेका थिए ।

नेपाल रेडक्रस सोसाइटी पोखरा–कास्कीको प्राविधिक सहयोगमा रक्तदान भएको हो । सोही अवसरमा २ दिवसीय कार्यक्रम अन्तर्गत वडा प्रहरी कार्यालय पोखरा ३० लाई कार्यालय प्रयोजनका लागि १ दराज, शान्ति टोल विकास संस्था पोखरा ३० खुदीलाई सरसफाइका लागि डस्टबिन तथा साझा सांस्कृतिक समूह पोखरा ३२ र जेष्ठ नागरिक दिवा सेवा साझा बजारलाई नगद ११ हजार १ सय ११ रुपैयाँ हस्तान्तरण गरिएको थियो ।