पोखरा ।

पोखरा महानगरपालिकाको फोहोर व्यवस्थापनका लागि छनोट गरिएको ल्याण्डफिल साइटलाई लिएर चर्किँदै गएको विवाद शुक्रबार हिंसात्मक मोडमा पुगेको छ । पोखरा ३३ पुँडिटारमा प्रस्तावित ल्याण्डफिल साइटको विरोधमा स्थानीयवासीले वडा कार्यालय अगाडि प्रदर्शन गरिरहेका बेला वडाध्यक्ष रामचन्द्र अधिकारीले हातमा खुकुरी लिएर तर्साएपछि प्रहरीले नियन्त्रणमा लिएको छ ।

स्थितिलाई थप उग्र बन्न नदिन प्रहरीले वडाध्यक्ष अधिकारीलाई नियन्त्रणमा लिएको छ । त्यसक्रममा आक्रोशित प्रदर्शनकारीले वडाध्यक्षको निजी सवारीसाधनमा तोडफोड गरेका थिए भने आगजनीको प्रयाससमेत भएपछि प्रहरीले हस्तक्षेप गरेको थियो । वडाध्यक्ष बाकेर हिँड्न लागेको गाडीमा स्थानीयले ढुंगामुढासमेत गरेका थिए ।

कास्की प्रहरीका प्रवक्ता डीएसपी हरिबहादुर बस्नेतले वडाध्यक्षलाई सुरक्षा राखिएकाे जानकारी दिए । खुकुरी प्रदर्शन गरेको घटनाबारे अनुसन्धान भइरहेको र आवश्यक कानुनी प्रक्रिया अघि बढाइने उनले बताए ।