स्याङ्जा । स्याङ्जाको बिरुवा गाउँपालिकामा अवैध भरुवा बन्दुक र त्यसका पार्टपुर्जाहरुसहित एक जना वृद्धलाई प्रहरीले पक्राउ गरेको छ । बिरुवा गाउँपालिका वडा नम्बर ६, लेवा बस्ने ७२ वर्षीय राम बहादुर सुनारलाई प्रहरीले पक्राउ गरेको हो ।

विशेष सूचनाका आधारमा जिल्ला प्रहरी कार्यालय स्याङ्जाबाट खटिएको टोलीले गत पुस २६ गते सुनारको घरमा छापा मारेको थियो । उनको घरमा अवैध रुपमा भरुवा बन्दुक लुकाई–छिपाई राखेको र मर्मत कार्य समेत भइरहेको सूचनाका आधारमा खानतलासी गर्दा ठूलो परिमाणमा हातहतियार र विष्फोटक पदार्थ फेला परेको प्रहरीले जनाएको छ ।

सुनारको घरबाट एक थान तयारी भरुवा बन्दुक, नाल भएका तर पार्टपुर्जा जडान नभएका दुई थान बन्दुक र नाल नभएको एक थान बन्दुक गरी कुल चार थान बन्दुकका संरचनाहरु बरामद गरिएको छ । त्यसैगरी, बन्दुक बनाउन प्रयोग हुने फलामे रडहरु चार थान, भरुवा बन्दुकको चुच्ची ६ थान, १४२ ग्राम बारुद, १०७ वटा सिसाको छर्रा, ६ थान क्याप र बारुद बनाउन प्रयोग हुने एक किलो सोडा समेत बरामद भएको जिल्ला प्रहरी कार्यालय स्याङ्जाका सूचना अधिकारी एवं प्रहरी नायव उपरीक्षक प्रसन्नराज चौधरीले जानकारी दिए ।

प्रहरीले खानतलासीका क्रममा बन्दुक बनाउन प्रयोग हुने फलामे घोडा ३ थान, चिम्टी २ थान, फलामे किला ४ थान र फलामे छाप १ थान समेत फेला पारेको छ । पक्राउ परेका सुनारमाथि हातहतियार तथा खरखजाना सम्बन्धी मुद्दामा आवश्यक अनुसन्धान तथा कानुनी कारबाहीको प्रक्रिया अगाडि बढाइएको प्रहरीले जनाएको छ । हाल प्रहरीले बरामद सामग्रीसहित सुनारलाई नियन्त्रणमा लिएर थप अनुसन्धान गरिरहेको छ ।