पोखरा ।

जिल्ला विपद् व्यवस्थापन समिति कास्कीले आगलागी र वन डढेलो नियन्त्रणलाई प्राथमिकतामा राख्दै २१ बुँदे महत्त्वपूर्ण निर्णय गरेको छ । मंगलबार कास्कीका प्रमुख जिल्ला अधिकारी रुद्रादेवी शर्माको अध्यक्षतामा बसेको बैठकले ‘कास्की जिल्लाको वन डढेलो तथा आगलागी नियन्त्रण कार्ययोजना, २०८२/०८३’ स्वीकृत गर्दै कार्यान्वयनमा लैजाने निर्णय गरेको हो ।

बैठकले सुक्खा मौसममा हुनसक्ने आगलागीका घटना न्यूनीकरण गर्न सबै स्थानीय तहलाई सचेतनामूलक कार्यक्रम सञ्चालन गर्न र विपद्का बेला परिचालन हुने स्वयंसेवक तथा सामग्रीको व्यवस्था गर्न निर्देशन दिएको छ । डिभिजन वन कार्यालयलाई स्थानीय तहमार्फत सूचना प्रवाह गर्न र वन क्षेत्रमा ‘फायर लाइन’ (अग्निरेखा) निर्माणसहितका प्रतिकार्य योजना लागू गर्न भनिएको छ ।

हिउँदे मौसमको पूर्वतयारी
हिउँदमा उच्च हिमाली क्षेत्रमा हिमपात हुन सक्ने जोखिमलाई मध्यनजर गर्दै समितिले मौसम विज्ञान विभागको प्रक्षेपणका आधारमा पूर्वसूचना प्रवाह गर्न जल तथा मौसम विज्ञान प्रादेशिक कार्यालयलाई जिम्मेवारी तोकेको छ । यस क्षेत्रमा रहेका नागरिक, पर्यटन व्यवसायी र पदयात्रीलाई सावधानी अपनाउन स्थानीय स्तरका सुरक्षा निकायमार्फत सचेत गराइनेछ ।

२४ सै घण्टा ‘इओसी’ सञ्चालन
जिल्लाका ५ वटै स्थानीय तहमा गठन गरिएका स्थानीय आपतकालीन कार्यसञ्चालन केन्द्र (एलइओसी) लाई न्यूनतम उद्धार सामग्री र जनशक्तिसहित २४ सै घण्टा सञ्चालनमा ल्याउने निर्णय भएको छ । साथै, विज्ञ समूहबाट विपद् जोखिम नक्सांकन गराई पूर्वतयारी तथा प्रतिकार्य योजना तर्जुमा गर्न सबै पालिकालाई निर्देशन दिइएको छ ।

जोखिमयुक्त संरचनाको विवरण संकलन
समितिले एक महिनाभित्र जिल्लाका जोखिममा रहेका झोलुङ्गे पुल, सडक, सिँचाइ प्रणाली, सरकारी तथा निजी भवनको विवरण संकलन गर्न प्राविधिक कर्मचारी परिचालन गर्ने निर्णय गरेको छ । त्यस्तै, सडक र सार्वजनिक निकाय नजिकका जोखिमयुक्त रुखहरूको विवरण संकलन गरी व्यवस्थापन गर्न डिभिजन वन कार्यालयलाई जिम्मा दिइएको छ ।

पोखरा बजारमा पानीको फोहोराले आगो निभाउने प्रविधि
पोखरा महानगरपालिकाले बजार क्षेत्रमा आगलागी हुँदा पानी र अन्य रसायन फाल्न सक्ने दमकल र प्रविधिको सम्भाव्यता अध्ययन गर्न विज्ञ समूह गठन गरेको थियो । उक्त समूहले पोखराका अग्ला घरहरूमा बाहिरैबाट पानी फाल्न सक्ने गरी ६/७ तलासम्म आगो निभाउन मिल्ने प्रविधि भित्र्याउन सुझाव दिएको छ । सोही सुझावअनुसार महानगरले पूर्वतयारी थाल्ने भएको छ ।

मनसुन पूर्वअनुमान प्रणाली र बहुतहकोपीय पूर्वअनुमान
कास्की जिल्लामा विपद् पूर्वसूचना प्रणालीलाई प्रभावकारी बनाउन र मनसुनको पूर्वअनुमान गर्न विज्ञबाट अध्ययन गराइनेछ । साथै, जल तथा मौसम विज्ञान विभागको सहकार्यमा स्थानीय तहमा ‘बहुतहकोपीय पूर्वअनुमान प्रणाली’ स्थापना गरी विभागको संयन्त्र विकास गर्ने निर्णय भएको छ ।

निजी आवास पुनर्निर्माण र राहत
विपद् प्रभावित निजी आवास पुनर्निर्माण तथा पुनःस्थापना अनुदान कार्यविधि, २०७८ अनुसार लाभग्राहीको प्रमाणीकरण र किस्ता सिफारिस प्रक्रियालाई तीव्रता दिइनेछ । लाभग्राही कायम भएका तर सम्झौता हुन नसकेका पीडितको हकमा स्थानीय तहले समन्वय गरी विवरण संकलन गर्ने र अनुदान रकम निकासाको व्यवस्था मिलाउने निर्णय समितिले गरेको छ ।

भूकम्प सुरक्षा दिवस र सडक मर्मत
आगामी माघ २ गते मनाइने भूकम्प सुरक्षा दिवसमा सबै स्थानीय तह र सरोकारवालाले विविध कार्यक्रम गर्नेछन् । साथै, आगामी प्रतिनिधिसभा सदस्य निर्वाचनका लागि मतदान केन्द्रसम्म पुग्ने सडक र स्थानीय तहका कच्ची सडकको मर्मत सम्भार तथा खाल्डाखुल्डी पुर्ने काम तत्काल सुरु गर्न सम्बन्धित निकायलाई निर्देशन दिइएको छ ।

बैठकमा पोखरा महानगर प्रमुख धनराज आचार्य, गाउँपालिका अध्यक्षहरू, सुरक्षा निकायका प्रमुख र विषयगत कार्यालयका प्रमुखहरूको उपस्थिति थियो ।