समाधान संवाददाता
पोखरा

युवा नेता तथा तत्कालीन संस्कृति, पर्यटन तथा नागरिक उड्ययन मन्त्री स्व. रवीन्द्र अधिकारीको सालिक प्रधानमन्त्री केपी शर्मा ओलीले अनावरण गर्ने भएका छन् । पोखरा महानगर पालिकाले निर्माण गरिरहेको राष्ट्रिय विभूति तथा सहिद पार्कमा निर्माण गरिएको अधिकारीको सालिक फागुन १५ गते अनावरण हुँदै छ ।

हेलिकोप्टर दुर्घटनामा परी निधन भएका युवा नेता अधिकारीको पहिलो स्मृति दिवसका अवसरमा सालिक अनावरण गर्न लागिएको हो । गत वर्ष फागुन १५ गते ताप्लेजुङमा भएको हेलिकोप्टर दुर्घटनामा मन्त्री अधिकारीको निधन भएको थियो ।

पार्क निर्माण र व्यवस्थापनका लागि महानगरले पोखरा १८ का अध्यक्ष रणबहादुर थापाको अध्यक्षतामा राष्ट्रिय विभूति तथा सहिद पार्क व्यवस्थापन समिति गठन गरेको छ ।

समितिको बुधबार बसेको बैठकले फागुन १५ गते नै भव्य समारोह गरी स्व. अधिकारीको सालिक अनावरण गर्ने निर्णय गरेको हो । पोखराबाटै राजनीति सुरुआत गरी राष्ट्रिय राजनीतिमा प्रभावशाली छबि बनाएका अधिकारीको देशको सेवा गर्दा गर्दै अवसान भएकाले उहाँको योगदानको कदर गर्दै पार्कमा सालिक राखिएको पोखरा महानगरका मेयर मानबहादुर जिसीले बताए ।

सालिक अनावरणका लागि प्रधानमन्त्री केपी शर्मा ओलीलाई आमन्त्रण गरिएको छ । रवीन्द्र अधिकारी स्मृति प्रतिष्ठानले पनि सोही दिन पोखरा सभागृहमा कार्यक्रम आयोजना गरेकाले प्रधानमन्त्री ओली दुवै कार्यक्रममा सहभागी हुने प्रतिष्ठानका महासचिव धनराज आचार्यले जानकारी दिए ।