जोमसोमको चेछेन कुंगा छेक्र्योरलिङ गुम्बामा कोरोना संक्रमण नफैलिने विश्वासका साथ पूजा गर्दै लामाहरु । तस्बिरः एसके थकाली ।

एसके थकाली
जोमसोम

चीनबाट सुरु भई संसारभर संक्रमणको त्रास रहेको कोरोना भाइरस रोकिने विश्वास गरी मुस्ताङमा लामा पूजा गरिएको छ । जिल्लाको लोघेकर दामोदरकुण्ड गाउँपालिका ३ को घिलिङ गुम्बा र घरपझोङ गाउँपालिका ४ जोमसोमको चेछेन कुंगा छेक्र्योरलिङ गुम्बामा कोरोना भाइरसको पूजा गरिएको बताइएको छ ।

विश्व शान्ति, मानव समुदायको अनिष्ठ निरुपण, सुस्वास्थ्यका लागि यसअघि पनि मुस्ताङका गुम्बामा लामाहरुले बौद्ध धर्मसंस्कृति अनुसार पूजापाठ गर्ने गर्ने गरेका भए पनि यसपटक कोरोना संक्रमण रोक्न गुम्बामा पूजाआजा भइरहेको चेछेन कुंगा छेक्र्योरलिङ गुम्बाका लामा पाल्देन घ्याचो गुरुङले बताए । जोमसोममा ३ दिन अघिदेखि बिहानीपख १ दर्जन लामाले नियमति कोरोना पूजा गरिरहेका छन् ।

लामा पूजाले संक्रमितको रोग चाँडै निको हुने र अरुलाई रोग लाग्न नदिने धार्मिक विश्वास छ ।

कोरोना भाइसरका कारण २ हजार बढीले ज्यान गुमाएका छन् । केही हप्ता अघिदेखि जिल्ला प्रशासन कार्यालय तथा जिल्ला अस्पताल जोमसोमले समेत पर्चा पम्पेट वितरण गरेको छ । जोमसोम अस्पतालमा आउने प्रत्येक बिमारीलाई कोरोना भाइरसबाट सचेत रहन पर्चा वितरण गरिएको अस्पतालले जनाएको छ ।