समाधान संवाददाता
लेखनाथ

वेगनास ताल किनारमा जारी दोस्रो सेभेन ए साइड वेगनास कपको दोस्रो दिन ६ खेल भएका छन् । आइतबार भएको पहिलो खेलमा एनजिवाइसीले खेलको पहिलो मिनेटमै १ गोल हानेर पावरजिमलाई दबाबमा राख्यो । त्यसको केही मिनेटमै पावरजिमले अर्को गोल गर्दै खेल वराबरी बनायो । २ गोल बराबरीमा समय सकिएपछि खेल टाइबेकरमा पुगेको थियो । टाइबेकरमा ५ का विरुद्ध ६ गोल गर्दै एनजिवाइसी अर्को चरण प्रवेश गरेको हो ।

अर्को खेलमा हिमाल एन्ड रक्ष मेमोरियल एले नौलोतारा क्लबलाई ० का विरुद्ध ३ गोलले सहजै हरायो । हिमाल एन्ड रक्ष मेमोरियल सिले वेगनासताल मत्स्य ब्यवसायीसँग ३–२ को जित निकाल्यो ।

चौथो खेलमा मार्ली एफसीले वाक ओभर दिँदा बौद्ध शान्ति युवा क्लब सिधै अर्को चरण प्रवेश गरेको छ । निकै प्रतिस्पर्धात्मक खेलमा शुक्लागण्डकी क्लबलाई बेगनास रेडले ३ शून्य गोल अन्तरले सजिलै पाखा लगाउँदा राइजिङ स्टारले शान्तिदीपमाथि ३ २ को कठिन जित हात पारेको छ । पहिलो हाफ गोलरहित बराबरीमा सकिए पनि दोस्रो हाफको केही मिनेटमै शान्तिदीपले १ गोल गर्दै अग्रता लिएको थियो ।

तर उसको अग्रता केही मिनेटमा राइजिङले १ गोल गर्दै तोडेको थियो । त्यसपछि दुवै टोलीबाट कुनै गोल हुन नसकेपछि खेल टाइब्रेकरमा पुगेको हो । प्रतियोगितामा सोमबार ६ खेल हुने प्रतियोगिता संयोजक सुरेन्द्र पुनले बताए ।

प्रतियोगिताको विजेताले १ लाख ५ हजार ५ सय ५५ सहित ट्रफी, मेडल र प्रमाणपत्र प्राप्त गर्नेछ । उपविजेताले ५५ हजार ५ सय ५५ सहित ट्रफी, मेडल र प्रमाणपत्र हात पार्ने छ। प्रतियोगितामा उत्कृष्ट खेलाडी, उच्च गोलकर्ता र उत्कृष्ट गोलरक्षकले जनही ५ हजार पाउने छन् ।