समाधान संवाददाता, पोखरा

पोखरा महानगरपालिकाका थप २१ जनामा कोरोना संक्रमण पुष्टि भएको छ ।

स्वास्थ्य निर्देशनालय, गण्डकी प्रदेशले सार्वजनिक गरेको विज्ञप्ति अनुसार क्षयरोग उपचार केन्द्रमा गरिएको परिक्षणमा २१ जनामा संक्रमण देखिएको हो ।

आज थपिएका संक्रमितमध्ये २ जना चरक मेमोरियल अस्पतालका कर्मचारी हुन् ।

चरकमा कार्यरत पोखरा ८ का ६७ र ५० वर्षीय पुरुष कर्मचारीमा संक्रमण पुष्टि भएको हो ।

साथै नेपाल टेलिकम, पोखरा शाखामा कार्यरत पोखरा १६ की ३३ वर्षीया महिला कर्मचारीमा संक्रमण पुष्टि भएको छ ।

आज कोरोना देखिनेमा पोखरा १४, ४, १५, १, ३२, १७ का ७ जना संक्रमित भारतबाट आएर क्वारेन्टिनमा रहेका थिए ।

पोखरा ८, २०, ५, २२, १६, ३०, १०, ९ का संक्रमित भने कन्ट्याक्ट ट्रेसिङबाट फेला परेका हुन् ।

आज नै बाग्लुङमा ३६ र लमजुङमा ५ संक्रमित फेला परेका छन् । यो सँगै गण्डकी प्रदेशमा कोरोना संक्रमितको संख्या ४ हजार ७५३ पुगेको छ ।