समाधान संवाददाता, पोखरा

अखिल नेपाल आदिवासी जनजाति महासंघले संसद विघटन नेकपाको आन्तरिक कारणले मात्र नभई विदेशी शक्ति केन्द्रको निर्देशनमा भएको दाबी गरेको छ ।

नेपाल कम्युनिस्ट पार्टी क्रान्तिकारी माओवादी निकट महासंघले पार्टीको अन्तर कलहले हठात नभई घटनाक्रमले नियोजित र योजनावद्ध ढंगले भएको दाबी गरेको हो ।

महासंघ अध्यक्ष प्राडा ओम गुरुङले अन्तर्राष्ट्रिय शक्ति केन्द्रको चलखेलले प्रधानमन्त्री केपी शर्मा ओलीलाई साथ दिएको बताए ।

नेपालको समसामयिक राजनीतिक घटनाक्रम तथा महासंघको केन्द्रीय समिति बैठकको निर्णय सार्वजनिक गर्न मंगलबार आयोजना गरेको पत्रकार भेटघाटमा अध्यक्ष गुरुङले संसदको विघटनले संघीयता, गणतन्त्र, समावेशीता र धर्म निरपेक्षतालाई समाप्त पारेको उल्लेख दाबी गरे ।

‘देखाउनका लागि पार्टीको अन्तरकलह प्रचण्ड नेपाल समूहको भागबण्डा,सत्ता स्वार्थ वार्गेनिङ भनियो,’ उनले भने, ‘प्रतिगमन र विदेशीको चलखेल नै विघटनको प्रमुख कारण हो ।’

उनले विघटनको कारण प्रतिगामी तथा विदेशी शक्ति केन्द्रको चलखेल बढेको दाबी गरे ।

नयाँ सविधान र संघीयताले आदिवासी जनजातिको हक, अधिकार सुनिश्चित नगर्ने दाबी गर्दै अध्यक्ष गुरुङले जनजातिको पहिचान, स्वशासन सबै हराएर जाने तथा सबै आन्दोलनको उपलब्धि समाप्त भएको उल्लेख गरे ।

महासंघका महासचिव नगेन्द्र राईले संसद विघटनले राष्ट्र र जनताको कुनै हित नगर्ने बताए ।

संविधानमा संसद विघटनको व्यवस्था नभएको उल्लेख गर्दै उनले विघटन प्रधानमन्त्री ओलीको आत्मकेन्द्रीत र निरंकुशतर्फ उन्मुख कदम भएको टिप्पणी गरे ।