समाधान संवाददाता, पोखरा

प्रथम टाइगर कप आमन्त्रित राष्ट्रिय महिला तथा पुरुष भलिबल प्रतियोगिता मंगलबारबाट सुरु हुँदै छ । टाइगर ग्रुप अफ नेपालले आयोजना गरेको प्रतियोगिताको पहिलो खेल महिलातर्फको हुनेछ ।

पहिलो खेलमा विभागीय डर्बीबीच प्रतिश्पर्धा हुनेछ । बिहान १० बजे हुने खेलमा सशस्त्र प्रहरी बलको एपिएफले नेपाल पुलिस क्लबको सामना गर्ने खेल तालिका छ ।

त्यस खेललगत्तै त्रिभुवन आर्मी क्लबले न्यु डायमन्ड स्पोर्टस् क्लबसँग प्रतिस्पर्धा गर्नेछ । खेल मध्यान्न १२ बजे हुनेछ । महिलातर्फका २ खेलपछि उद्घाटन समारोह आयोजना हुनेछ ।

समारोहपछि पुरुषतर्फका खेल थालिने तालिका छ । घरेलु टोली गण्डकी प्रदेशले विभागीय टोली नेपाल पुलिस क्लबसँग खेल्नेछ ।

प्रतियोगिताको दोस्रो दिन पुरुषका २ खेल हुनेछन् । बुधबार पहिलो खेलमा साढे १० बजे गण्डकीले त्रिभुवन आर्मी क्लबसँग खेल्नेछ । दोस्रो खेलमा नेपाल पुलिस क्लब र सशस्त्र प्रहरी बलबीच प्रतिश्पर्धा हुनेछ ।

बुधबार महिलातर्फ १ खेल हुनेछ । साढे २ बजे नेपाल पुलिस क्लबसँग त्रिभुवन आर्मी क्लब भीड्नेछ ।

बिहीबार पुरुषतर्फ त्रिभुवन आर्मी क्लब र सशस्त्र प्रहरी बलबीच खेल हुनेछ । महिलातर्फ सशस्त्र प्रहरी बल र त्रिभुवन आर्मी क्लब आमनेसामने हुँदा नेपाल पुलिसले न्यु डायमन्डसँग प्रतिस्पर्धा गर्नेछ ।

शुक्रबार महिलातर्फ सशस्त्र प्रहरी बलले न्यु डायमन्डसँग खेल्नेछ । पुरुषतर्फ गण्डकीले सशस्त्र प्रहरी बल र नेपाल पुलिसले त्रिभुवन आर्मीसँग खेल्ने तालिका छ । फाइनल खेल शनिबार हुनेछ । डबल राउन्ड रोबिन फम्र्याटमा हुने प्रतियोगितामा पहिलो र दोस्रो हुने टोलीले फाइनल खेल्ने छन् ।

प्रतियोगिता पोखरा रंगशालामा माघ २७ देखि फागुन १ गतेसम्म हुनेछ । गण्डकी प्रदेशका मुख्यमन्त्री पृथ्वीसुब्बा गुरुङले प्रतियोगिता उद्घाटन गर्ने कार्यक्रम छ ।

प्रतियोगितामा उपाधि विजेता महिला तथा पुरुष टिमले समान १ लाख ५० हजार, द्वितीय हुनेले ७५ हजार तथा तृतीयले नगद २५ हजारका साथमा मेडल, ट्रफी र प्रमाणपत्र प्राप्त गर्ने आयोजकले जनाएको छ । सर्वोत्कृष्ट महिला तथा पुरुष खेलाडीले समान २० हजार पाउने छन् ।

उत्कृष्ट सर्भर, उत्कृष्ट सेटर, उत्कृष्ट ब्लकर, उत्कृष्ट डिफेन्डर तथा स्पाइकर महिला तथा पुरुष खेलाडीले समान ५ हजार नगद प्राप्त गर्ने छन् ।

प्रतियोगिता गर्न २५ लाख खर्च हुने अनुमान छ । प्रतियोगिताबाट ३० लाख बचत हुने गु्रपका अध्यक्ष नारायण शर्माले जानकारी दिए । बचत रकम सामाजिक, खेल क्षेत्र र खेलाडीको सहयोगका लागि खर्च हुने उनले बताए ।

प्रतियोगितामा पहिलो चरणका खेलका लागि टिकट दर १ सय रुपैयाँ तोकिएको छ । सेमीफाइनलका लागि १ सय ५० रुपैयाँ र फाइनल खेलका लागि २ सय रुपैयाँ कायम गरिएको छ ।