पोखरा ।
नेपाल अपाङ महिला संघको आयोजनामा पोखरामा अपांगता भएका महिला, बालिकाविरुद्ध हुने लैगिंक हिंसा र आघात व्यवस्थापनसम्बन्धी ५ दिने ट्रमा काउन्सेलिङ तालिम सुरु भएको छ ।

विभिन्न परिस्थितिका कारणा अपांग भएकाहरुले भोग्नु परेको विभेद, हिंसा र त्यसबाट उत्पन्न हुने मानसिक स्वास्थ्य समस्यालाई कसरी व्यवस्थापन गर्न सकिन्छ भन्ने विषयमा तालिम केन्द्रित रहेको सहजकर्ता कञ्चन रावतले जानकारी दिए । उनले भने, ‘जीवन सधै सोचे जस्तो हुँदैन । सोच्दै नसोचेका कतिपय घटना दुर्घटनाले मानिसको जीवनले फरक मोड लिन्छ, त्यसलाई स्वीकार्न मानिसलाई निकै गाह्रो हुन्छ । यसबाट मानसिक समस्याहरु देखिन्छन् ।’

रावतले ५ दिवसीय तालिमबाट विभिन्न मोडमा रहेका अपांगता भएका महिलालाई उदासी र नैराश्यताबाट टाढा रहेर कसरी सकारात्मक रुपमा सार्थक जीवन जिउने भन्ने विषयमा सिकाउने उल्लेख गरे । सेवाग्राहीको प्रारम्भिक अवस्थाको मनोविज्ञान अध्ययन गरेर सेवा प्रदायकले सोही आधारमा प्रभावकारी सेवा प्रदान गर्न सक्ने व्यवहारिक पक्षलाई तालिममा समावेश गरिएको रावतको भनाइ छ ।

नेपाल अपांगता महिला संघका अध्यक्ष तारा दाहालले अपांगता भएकाप्रति समाज अझै पनि सकारात्मक हुन नसकेको जनाइन् । उनले प्रदेशका कास्की, तनहुँ, म्याग्दी, गोर्खा जिल्लाका अपांगता भएका महिला तथा सरोकारवालाका लागि पहुँचयुक्त आघात व्यवस्थापन र मनोपरामर्श तालिम प्रदान गरेर उनीहरुको पीडालाई कम गर्ने तालिमको उद्देश्य रहेको उल्लेख गरिन् ।
नेपालमा भूकम्प र कोभिडपछि मानसिक स्वास्थ्यमा धेरै समस्या देखिएको र यसलाई अझै पनि समाजले समस्याको रुपमा लिन नसक्दा यो विकराल बन्दै गएको उनको भनाइ छ ।

तालिममा राष्ट्रिय अपांग महासंघ अनुशासन आयोगका सदस्य लोचना अधिकारीले समाजमा अपांगता भएका महिलाले विभिन्न खाले हिंसा भोगिरहेको तर त्यसलाई बाहिर ल्याउन सहज वातावरण नहुँदा पीडा लिएर बाँच्न बाध्य भएको सुनाइन् । तालिममा प्रदेशका ४ जिल्लाका ३० जना सहभागी रहेको संघका गण्डकी प्रदेशका फोकल पर्सन गंगा देवकोटाले जानकारी दिइन् ।