पोखरा ।
महिला पर्यटन व्यवसायी मञ्च (ओटेफ) पोखरा र प्रदेश नं १ का महिला पर्यटन व्यवसायीबीच अनुभव आदानप्रदानसहित पर्यटन प्रवद्र्धनका व्यवसायिक विषयमा छलफल भएको छ । सो अवसरमा ओटेफ पोखराको पहलमा महिला पर्यटन व्यवसायी मञ्च प्रदेश नं १ समेत गठन गरिएको थियो ।

प्रदेश १ को अध्यक्ष सुशीला सापकोटा र उपाध्यक्ष दिव्या भटराई, ललिता प्रसाई, महासचिव शारदा उप्रेती पराजुली, सचिव स्तुती श्रेष्ठ र कोषाध्यक्ष रोमी पौडेल छन् । कार्यसमिति २० सदस्यीय छ ।

ओटेफ पोखरा र प्रदेश नं १ का महिला पर्यटन व्यवसायीबीच अनुभव आदानप्रदानसहित पर्यटन प्रवद्र्धनमा सहकार्य गर्ने सहमति

Advertisement

पर्यटन क्षेत्रमा महिला सहभागिता बढाउने आर्थिक सशक्तीकरणसँगै गण्डकी प्रदेश पोखरा र प्रदेश नं १ बीच सम्बन्ध स्थापित गर्ने उद्देश्यले पोखराबाट अध्यक्ष र सल्लाहकारसहित पुगेको टोलीले प्रदेश नं १ मा पर्यटन प्रवद्र्धन केन्द्रित कार्यक्रम गरेको हो ।
कार्यक्रममा इलाम नगरपालिका प्रमुख केशव थापाले पर्यटकीय स्थल पोखराबाट इलामले पर्यटन प्रवद्र्धनमा लागि धेरै कुरा सिक्न सक्ने जनाए । पर्यटनका लागि प्रचारप्रसारको आवश्यता औल्याउँदै उनले समन्वयकारी भूमिका खेल्न ओटेफलाई आग्रह गरे ।

उपप्रमुख विष्णुमाया दाहाल लिम्बुले महिला सशक्तीकरणका लागि आर्थिक सशक्तीकरणको आवश्यता औल्याउँदै पूर्वका महिला उत्पादनमा अगाडि रहेको बताइन् । उनले कर्ममा विश्वास गरेर निरन्तरअघि बढे एक दिन मूल्यांकन हुने बताइन् । जनाउँदै महिलाले आफ्नो मेहनत र लगनशीलता त्याग्न नहुने धारणा राखिन् । नगरपालिकाले महिलाको क्षमता विकास र सीप विकासका लागि बजेट छुटाएको जानकारी उनले गराइन् ।

नेपाल पर्यटन बोर्डका कार्यकारिणी सदस्य कृष्ण शाहले गण्डकी र प्रदेश १ का महिलाबीच अन्तरक्रियात्मक एवं क्षमता विकास कार्यक्रमले पर्यटन प्रवद्र्धन साथै पूर्वमा उत्पादित सामानको प्रचारप्रसार र बजारीकरणमा टेवा पुग्ने विश्वास व्यक्त गरे ।
नगर पर्यटन परिषदको आयोजना, नेपाल पर्यटन बोर्ड नेपालको प्रवद्र्धन र इलाम नगरपालिकाको सहयोगमा सञ्चालित प्रदेश स्तरीय कार्यक्रममा प्रदेश नं १ का ६ जिल्लाका व्यवसायिक महिलाको सहभागिता थियो । कार्यक्रममा सहभागीले पूर्वमा उत्पादन गरेका सामानको प्रवद्र्धन गर्न पोखरा उपयुक्त गन्तव्य भएकाले समन्वय गर्न पोखराका व्यवसायी महिलालाई अनुरोध गरेका थिए ।

इलामको चियासँगै प्रदेश एकमा अलैची, अदुवा, आलु, अम्रिसो, अर्थोडक्स, किबी, चिज, छुर्पी, ललिपपले प्रसिद्ध रहे पनि उचित बजार व्यवस्थापन अभाव रहेको सहभागीको भनाइ थियो । पूर्वका उत्पादित सामानलाई कोशेलीको रुपमा ब्रान्ड गर्न साझेदारीको खाँचो उनीहरुले औंल्याए । महिला पर्यटन व्यवसायी मञ्च (ओटेफ) पोखरा अध्यक्ष पार्वती पाण्डेले पोखराको पर्यटन र महिला पर्यटन व्यवसायीको अवस्थाबारे प्रकाश पारिन् । उनले पूर्वको उत्पादनलाई पोखरामा प्रवद्र्धन गर्नका लागि पहल गर्ने बताइन । ओटेफकी सल्लाहकार देवका पहारीले पर्यटन क्षेत्रका आफ्ना अनुभवसँगै पश्चिम र पूर्वबीचको सम्बन्धलाई मजबुत बनाएर उत्पादनलाई प्रवद्र्धन गर्न समन्वयकारी भूमिका खेल्ने जनाइन् ।

कार्यक्रममा नगर पर्यटन परिषदका इलामका अध्यक्ष प्रकाश अधिकारीले पोखरा पर्यटकीय क्षेत्र भएकाले सो क्षेत्रका महिला र पूर्वका पर्यटन व्यवसायी महिलाबीच अनुभव आदानप्रदानले प्रदेश १ र पोखरा बीचको सम्बन्ध प्रगाढ हुनुका साथै व्यवसायिक साझेदारीमा सहयोग पुग्ने विश्वास व्यक्त गरे । कार्यक्रममा सहभागीलाई नेपाल पत्रकार महासंघ कास्की उपाध्यक्ष जमुना वर्षा शर्माले पर्यटनमा महिलाको अवस्था र नेतृत्व विकाससम्बन्धी प्रशिक्षण दिएकी थिइन् ।