जोमसोम ।
घरपझोङ गाउँपालिकाको वडा नं. ४, ५, र १ जोड्ने ठिनी खोलामा अस्थायी पुल बनाइँदै छ । गाउँपालिकाको आर्थिक वर्ष २०७९/०८० को विनियोजित ५ लाख ५० हजार बजेटबाट ठिनी खोलामा अस्थायी पुल निर्माणको कामअघि बढाइएको हो ।

गाउँपालिकाले चालु वर्ष विनियोजित बजेटले ८ मिटर लामो र ४ मिटर चौडा अस्थायी पुल निर्माणको कामअघि बढाएको इन्जिनियर सकलदेव शर्माले जानकारी दिए । यो पुलमा ६ वटा फलामका च्यानल राखिएको छ भने च्यानलमाथि नटबोल्ट सिस्टमको काठ बिच्छ्याइनेछ ।

फलामे च्यानल लगायतका प्राविधिक सामान पालिकाले उपलब्ध गराएको र स्थानीय उपभोक्ता समितिले काठ र निर्माणको जिम्मा लिएको शर्माको भनाइ छ । यसअघि यो खोलामा काठको अस्थायी पुल भए पनि सो पुल जीर्ण थियो । बर्खायामको समयमा सर्वसाधारणलाई आउजाउ गर्न, निर्माण सामग्री लैजान, खाद्यन्न तथा अन्य मालसामान ओसारपसार गर्न समस्या थियो ।

२ वर्षअघि ठिनी खोलाको जीर्ण पुलबाट निर्माण सामग्री बोकेको ट्रक पुल भाँचिएर खस्ता २ जना कामदारले ज्यान गुमाएका थिए । इन्जिनियर शर्माले पुल बनेपछि पर्यटकीय स्थल ढुम्बातालसम्म सवारी साधन लैजानसमेत सहज हुने बताए । घरपझोङले मनसुन सुरु भएको र बर्खायामको बाढीले सर्वसाधारणलाई आवतजावतमा समस्या पर्ने भएकाले सो स्थानमा अस्थायी पुल निर्माणको योजना अघि बढाएको पालिका अध्यक्ष मोहनसिंह लालचनले जानकारी दिए ।