पोखरा ।
विश्व स्तनपान दिवसको अवसरमा सप्ताहव्यापी कार्यक्रम गरिरहेको जोन्टा क्लब अफ पोखराको आयोजनामा मंगलबार लेकसाइडस्थित तालबाराही माविमा स्तनपानसम्बन्धी सचेतना कार्यक्रम भएको छ । कार्यक्रममा पोखरा ६ का वडाध्यक्ष विष्णुबहादुर भट्टराईले जोन्टा क्लबले समय सान्दर्भिक कार्य गरेको भन्दै अभियानको प्रशंसा गरे ।

वडा भवन निर्माणको चरणमा रहेको जानकारी दिँदै उनले अब बन्ने भवनमा सुरक्षित स्तनपानका लागि छुट्टै कक्षको निर्माण गरिने आश्वासन दिए । कार्यक्रममा स्त्री तथा प्रसूति रोग विशेषज्ञ डा.चन्द्रिका पण्डितले महिलाले सुत्केरी हुनुपुर्व र भएपछि गर्नुपर्ने शारीरिक अभ्यासका बारेमा प्रशिक्षण दिइन् । त्यस्तै, आहार तथा पोषण परामर्शदाता विद्या रघुनादन कायस्थले सुत्केरी महिला र नवजात शिशुलाई दिनुपर्ने सन्तुलित भोजनका विषयमा प्रकाश पारिन् ।

फिजियोथेरापिस्ट शुभा कोइरालाले गर्भवती र सुत्केरी अवस्थामा महिलाले गर्नुपर्ने व्यायामका विषयमा सहजीकरण गरिन् । जोन्टा क्लब अफ पोखराका अध्यक्ष मोनिका थापाले नवजात शिशुलाई आमाको दूध सबैभन्दा ठूलो पोषण भएको उल्लेख गरिन् ।