पोखरा ।
पोखरा १७ सीतापाइलामा रहेको समृद्धि सीतापाइला महिला समूहको शनिबार भएको छैटौं साधारणसभा तथा तेस्रो अधिवेशनले सर्वसम्मत नयाँ समिति चुनेको छ । समितिको अध्यक्षमा सावित्रा पहाडी, उपाध्यक्ष अनिषा बराल, सचिव सुशीला पौडेल, कोषाध्यक्ष कल्पना रेग्मी र सहसचिव सुमित्रा राना छन् ।

९ सदस्यीय समिति सदस्यमा भगवती अर्याल, डिलकुमारी शाही, सुनीता नेपाली, जुना खड्गी चुनिए । सँगै भएको समृद्धि टोल विकास संस्थाको विशेष भेलाले रिक्त सचिवमा देवी अधिकारीलाई निर्वाचित गरेको छ । टोल विकास संस्थाका सल्लाहकार माधव पनेरुको संयोजकत्वमा रहेको निर्वाचन मण्डलले चुनावी प्रक्रिया सम्पन्न गरेको हो । नवनिर्वाचित अध्यक्ष पहाडीले यसअघिको समितिले गरेका राम्रा कामलाई निरन्तरता दिँदै महिला सशक्तीकरण र टोलको विकासमा लाग्ने प्रण गरिन् ।

समारोहमा समृद्धि टोलमा ट्रस्ट निर्माण उपभोक्ता समितिका अध्यक्ष फडिन्द्र अधिकारी भवन निर्माणको आयव्यय सार्वजनिक गरे । यहाँ १२ लाख ८९ हजार लागतमा भवन बनेको छ । साधारणसभाले सचिव अनिषा बरालको प्रगति प्रतिवेदन र कोषाध्यक्ष वसन्ती खत्रीको आर्थिक प्रतिवेदन सर्वसम्मत पारित गरेको छ ।

सभामा फिस्टेल ड्रिम पार्कका सञ्चालक कमलबहादुर बस्नेतले सीतापाइला क्षेत्रको विकासमा टोल विकास संस्था र आमा समूहले उदाहरणीय भूमिका निर्वाह गरेको बताए । उनले टोलसँग सहकार्य गर्दै ड्रिम पार्क अगाडि बढ्ने बताए । समृद्धि टोलमा रहेको बोरिङका सञ्चालकसमेत रहेका बस्नेतले टोल विकास संस्थालाई सित्तैमा खानेपानी उपलब्ध गराउने प्रतिवद्धता जनाए ।

टोलका संरक्षक भोजबहादुर भुजेलले महिला सशक्तीकरण र टोलका विकासका लागि महिला समूहको उल्लेख्य भूमिका रहेको बताए । उनले स्थानीय सरकार र स्थानीयसँग सहकार्य गरी समृद्धिमा लाग्न आग्रह गरे । निर्वाचन मण्डलका संयोजक पनेरुले निर्वाचनपछि एकत्रित भएर आफ्नो उद्देश्यमा लाग्न आग्रह गरे ।

महिला समूहका अध्यक्ष अनिषा तामाङको अध्यक्षतामा भएको कार्यक्रममा उपाध्यक्ष मीना पौडेलले पनि बोलेकी थिइन् । कार्यक्रममा महिला समूहकी सांस्कृतिक उपसमिति संयोजक देवी अधिकारीको अग्रसरतामा कोभिडबारे सचेतनामूलक तीजगीत प्रस्तुत गरिएको थियो ।