पोखरा l
पोखरा महानगरपालिकाकी उपप्रमुख मञ्जुदेवी गुरुङले महिलाले गहना र कपडालाई प्रतिष्ठाको विषय बनाउन नहुनेमा जोड दिएकी छन् । आरकेडी उद्यमशील महिला क्लबले पोखरामा आयोजना गरेको हरितालिका (तीज) विशेष कार्यक्रममा उनले महिला व्यवसायी, शिक्षा र नेतृत्वलाई प्रतिष्ठाको विषय बनाएर अगाडि बढनुपर्ने विचार राखिन् ।

उनले भनिन्, ‘अब गहना र कपडा लगाउने प्रतिस्पर्धामा लागे महिला सशक्तीकरण र नेतृत्वमा स्थापित हुन सक्दैनौं । त्यसैले पुरुषसँग प्रतिस्पर्धा गर्नसक्ने गरी सक्षम हुनुपर्छ ।’ महिलालाई आर्यआर्जनसँग जोडिन उनको अनुरोध छ । महिलालाई सचेत र उद्यमी बनाउन पोखरा महानगरले उपप्रमुखसँग महिला कार्यक्रम सञ्चालन गरिरहेकाले त्यसमा संलग्न हुन उनले आग्रह गरिन् ।

आरकेडी उद्यमशील महिला क्लब अध्यक्ष रीता पौडेलको अध्यक्षतामा भएको कार्यक्रममा पोखरा १५ का पूर्व वडा सदस्य पार्वती कार्की, उद्योग वाणिज्य संघका सदस्य मुना बास्तोला, हर्कबहादुर अधिकारी लगायतले बोलेका थिए ।