पोखरा ।
परोपकारी संस्था किवानिज इन्टरनेसनलको चौथौं राष्ट्रिय महाधिवेशन बिहीबारबाट पोखरामा सुरु हुँदै छ । बालबालिकाको क्षेत्रमा परोपकारी सेवा गर्दै आएको यो अन्तर्राष्ट्रिय संस्थाले नेपालमा विशेष गरी बालबालिकाको शिक्षा, स्वास्थ्य र वातारणको क्षेत्रमा काम गर्दै आएको छ ।

पोखरामा हुन लागेको सम्मेलनमा संस्थाका सभापति पिटर मेनकुसो अमेरिकाबाट आउँदै छन् । अधिवेशनले नयाँ गर्भनर छनोट गर्ने छ । अहिले एकराज पन्त गर्भनर छन् । सम्मेलनले ३ वर्षपछि गभर्नर बन्ने भाइस गर्भनर छनोट गर्ने छ । किवानिज इन्टरनेसनल स्वयंसेवी संस्था हो ।

यसले १ सय ५ वर्षअघि अमेरिकाको मिसिगनबाट स्वयंसेवा सुरु गरेको थियो । संसारभर संस्थामा ६ लाखभन्दा बढी स्ययंसेवी छन् । नेपालमा यसका ४ सय सदस्य छन् । सम्मेलनमा २ सय जना सहभागी हुने जनाइएको छ । किवानिजले विश्वभरका आफूसँग आबद्ध क्लबलाई ५० डिस्ट्रिक्टमा विभाजन गरेको छ । नेपाल के–६९ डिस्ट्रिक्टमा पर्छ ।

नेपालमा सन् २०१५ मा किवानिज इन्टरनेसनल विधिवत् दर्ता भएको थियो । ४ वर्षको अवधिमा संस्थाले ग्रामीण क्षेत्रका विपन्न बालबालिकालाई शैक्षिक सामग्री वितरणदेखि विद्यालय भवन पुनर्निर्माणसम्मका काम गरेको छ । किवानिज युनिसेफलाई ठूलो धनराशि सहयोग गर्नेमध्ये एक हो । विश्वभर युनिसेफका थुप्रै कार्यक्रमकाल लागि संस्थाले आर्थिक सहयोग जुटाउँदै आएको छ ।