पोखरा ।
पोखरा महानगरपालिकाले भूकम्प प्रविधि राष्ट्रिय समाज (एनसेट) नेपाल, प्राक्टिकल एक्सन नेपाल र लुथरन बल्र्ड फेडेरेसनका प्राविधिक सहयोगमा विपद् जोखिम न्यूनीकरण तथा व्यवस्थापन विषयमा तालिम सञ्चालन गरेको छ ।

कार्यपालिकाका सदस्य तथा विषयगत शाखाका प्रमुखहरुको सहभागिता रहेको तालिममा भूकम्प प्राविधि राष्ट्रिय समाज (एनसेट) नेपालका गण्डकी प्रदेशका संयोजक किरण सेढाई, नीति तथा योजना आयोग गण्डकीका उपसचिव प्रेमराज गिरीले सहजीकरण गरेका थिए ।

पोखरा महानगरपालिकाका उपमेयर मञ्जुदेवी गुरुङले विपद्को साझा बुझाई निर्माण गर्न तथा शासकीय व्यवस्थामा विपद्को विषयलाई मुल प्रवाहीकरण गर्न तालिम फलदायी हुने बताइन् । उनले संकटासन्न बस्तीको क्षमता विकास गर्न तथा अब बन्ने विकासलाई बलियो बनाउन विपद्को विषयलाई मुल प्रवाहीकरण गर्नुपर्ने उल्लेख गरिन् ।

प्रमुख प्रशासकीय अधिकृत वीरेन्द्रदेव भारतीले सहरी विपद् जोखिम व्यवस्थापन लगायत विकास प्रक्रियामा विपद् जोखिम व्यवस्थापनको सवाललाई मुल प्रवाहीकरण गर्नुपर्ने बताए ।

कार्यक्रममा नेपाल रेडक्रस सोसाइटी गण्डकी प्रदेशका सभापति सूर्यप्रसाद ढकाल, अन्तर्राष्ट्रिय आप्रवासी संगठन (आइओएम)का गण्डकी संयोजक निर्मल चोङवाङ लगायतले तालिमको महत्वबारे बोलेका थिए । युएसआइडी, बिएचए र अन्तर्राष्ट्रिय आप्रवासी संगठन, युएन माइग्रेसनको सहयोगमा तालिम भएको हो ।