जोमसोम ।
मुस्ताङमा १ विदेशी र १ नेपाली पर्यटकका २ ड्रोन क्यामेरा जिल्ला प्रहरी कार्यालय मुस्ताङले जफत गरेको छ । ती क्यामेरा प्रहरीले जोमसोम नागरिक उड्यन कार्यालय मुस्ताङलाई बुझाएको छ ।

शुक्रबार मुस्ताङको वारागुङ मुक्तिक्षेत्र ४ कागबेनी माथिको सेल्फी पार्क र थासाङ गाउँपालिका ३ लेतेबाट अनुमती बिना उडाइएका ड्रोन प्रहरीले नियन्त्रणमा लिएको थियो ।

जिल्ला प्रहरी कार्यालय मुस्ताङका सूचना अधिकारी गोपीकृष्ण सुवेदीका अनुसार मुस्ताङको कागबेनीदेखि मुक्तिनाथ जाने सडकको सेल्फी पार्कमा भारतको हैदरावादबाट मुस्ताङ घुम्न आएका ३२ वर्षीय नागराज वाकेटीको ७ सय ५० ग्राम तौल भएको ड्रोन उठाएका थिए ।

ड्रोन इजाजत नभएको र स्थानीय प्रशासनबाट ड्रोन उडान अनुमतीपत्र समेत नलिई एक्लै ड्रोन उडाउदै गरेको अवस्थामा स्थानीयले देखेपछि प्रहरीलाई खबर गरेका थिए । कागबेनी प्रहरी चौकीले वाकेटीलाई ड्रोन क्यामेरासहित नियन्त्रणमा लिई जिल्ला प्रहरी कार्यालय पठाएको थियो । उनलाई सोधपुछ गरी प्रहरीले छाडिएको सुवेदीले बताए ।

शुक्रबार नै लेतेमा ड्रोन उडाउँदै गरेको अवस्थामा बूढानीलकण्ठ नगरपालिका घर भई मुस्ताङ घुम्न आएका २९ वर्षीय स्वासत खरेलको २ सय ४९ ग्रामको ड्रोन क्यामेरा प्रहरीले नियन्त्रणमा लिएको थियो ।

कृषि, शिक्षा, स्वास्थ्य, वन तथा वातावरण, कला, संस्कृति, मनोरञ्जन, विकास तथा विपद् व्यवस्थापन, सुरक्षा तथा आम सञ्चार जस्ता बिषयमा अध्ययन, अनुसन्धान, सूचना सम्प्रेषण्, सर्वेक्षण आदिका लागि ड्रोन उपयोग गर्ने व्यक्ति ,संघ र संस्था लगायतले नेपाल नागरिक उड्यन प्राधिकरणको अनुमती लिनुपर्ने हुन्छ । यस्तै सम्बन्धित क्षेत्रको स्थानीय प्रशासनको समेत स्वीकृति लिनुपर्ने प्रावधान छ ।

चालु आर्थिक वर्षमा मुस्ताङमा ड्रोन क्यामेरा उडाउन ९ जनाले जिल्ला प्रशासन कार्यालय मुस्ताङबाट लिखित अनुमती लिएको सहायक प्रमुख जिल्ला अधिकारी रामचन्द्र ढकालले जानकारी दिए ।

अन्नपूर्ण संरक्षित तथा नियन्त्रित क्षेत्रमा ड्रोन क्यामेरा उडान गरी फिल्म र डकुमेन्टी, भिडियो निर्माण गर्न अन्नपूर्ण संरक्षण क्षेत्र आयोजनाको प्रधान कार्यालयबाट पूर्व स्वीकृति लिनुपर्ने एक्याप जोमसोमका कार्यालय प्रमुख अशोक सुवेदीले जानकारी दिए ।