जोमसोम ।
मुस्ताङका स्वास्थ्य स्वयंसेविका तथा सरोकारवालालाई मतदाता शिक्षा तालिम दिइएको छ । निर्वाचनमा सकेसम्म बदर मतको संख्या घटाउन निर्वाचन आयोगले मतदाता शिक्षालाई प्रभावकारी बनाउन जिल्ला स्तरीय, पालिका र वडा स्तरीय रुपमा मतदाता शिक्षा समन्वय समिति गठन गर्न निर्देशन दिएको थियो ।

आयोगको कार्यतालिका बमोजिम सोमबार मुस्ताङका ५ वटै पालिकामा पालिका स्तरीय मतदाता शिक्षा तालिम सञ्चालन भएको छ । सोही क्रममा मुस्ताङको घरपझोङ गाउँपालिकामा मतदाता शिक्षा तालिम सञ्चालन गरिएको पालिका मतदाता शिक्षा समन्वय समितिका संयोजक गौरीप्रसाद आचार्यले जानकारी दिए । यसअघि जिल्ला निर्वाचन कार्यालयले ५ वटै स्थानीय तहका प्रमुख प्रशासकीय अधिकृतलाई मतदाता शिक्षा तालिम दिएको थियो ।

घरपझोङ गाउँपालिकासँगै लोमान्थाङ, लोघेकर दामोदरकुण्ड, वारागुङ मुक्तिक्षेत्र र थासाङ गाउँपालिकामा पनि वडासचिव, मतदाता शिक्षामा खटिने स्वास्थ्य स्वयंसेविका तथा अन्य सरोकारवाला निकायलाई तालिम दिइएको छ । पालिकाले तालिम दिएपछि वडा स्तरमा पनि वडा मतदाता शिक्षा समन्वय समितिमा अतिरिक्त तालिम दिइनेछ ।

मतदाता शिक्षामा खटिने स्वास्थ्य स्वयंसेविकालाई बदर मत सख्या खटाउन मतदाता शिक्षाको सैद्धान्तिक र व्यवहारिक ज्ञान दिलाउने, मतदान गर्न नागरिकलाई उत्प्रेरित गराउने, मतदाताको घरदैलोमा पुगेर दिइने मतदाता शिक्षाको पूर्व तयारी, निर्वाचनमा मतपत्रको ढाँचा र प्रकृति, मतदान प्रक्रिया र अन्य विभिन्न बिषयमा जानकारी गराइएको छ ।

हिमलाल शर्माले मतदाता शिक्षाबारे प्रस्तुतिकरण गरे । घरपझोङ गाउँपालिकाकी उपाध्यक्ष जमुना थकालीले मंसिर ४ गते हुने निर्वाचन नेपालीको महोत्सव भएको बताईन् । निर्वाचनमा जो कोही नागरिक पनि मतदानबाट बञ्चित हुन नहुने, नागरिकले आफ्नो मतधिकार स्वतन्त्र रुपमा प्रयोग गर्न पाउने अधिकार संविधानले सुनिश्चित गरिने उल्लेख गरिन् । प्रमुख प्रशासकीय अधिकृत गौरीप्रसाद आचार्यले बढीभन्दा बढी मतदान र बदर मतको संख्या न्यूनीकरण गर्न आयोगले मतदाता शिक्षालाई प्रभावकारी रुपमा अघि बढाएको बताए ।

तालिमपछि घरपझोङ गाउँपालिकाका ५ वटै वडामा खटिने स्वास्थ्य स्वयंसेविकलाई आयोगबाट पठाएको मतदाता शिक्षा सामग्री हस्तान्तरण गरिएको छ । पालिका स्तरमा प्रमुख प्रशासकीय अधिकृत संयोजकत्वमा ४ सदस्यीय मतदाता शिक्षा समन्वय समिति गठन भइसकेको छ भने सम्बन्धित वडा स्तरमा वडासचिवको संयोजकत्वमा ३ सदस्यीय मतदाता शिक्षा समन्वय समिति बनेको छ ।