पोखरा ।
नेपाल मगर सांस्कृतिक संघ, कास्कीको आयोजनामा यही पुस ३० गते असहाय तथा विपन्न नागरिकको सहयोगार्थ मगर सांस्कृतिक उत्सव २०७९ हुने भएको छ ।

पोखरा सभागृहमा हुने उत्सवमा स्थापित कलाकार ज्योति मगर, कुमार पुन, गीता पाइजा, नवीन रानालगायतका कलकारले सांगीतिक प्रस्तुति राख्ने अध्यक्ष सरिता सारूमगरले जानकारी दिइन् । उत्सवमा मगर जातिमा प्रचलित कौरा, सोरठी, घाँटु, झ्याउरे लगायतका मौलिक नृत्यसमेत प्रस्तुत हुनेछन् ।

कार्यक्रममा वरिष्ठ गायिका एवं अभिनेत्री कविता आले र पत्रकार रूद्रबहादुर श्रीसलाई सम्मान गरिने सचिव वसन्ती थापामगरले जानकारी दिइन् । सांगीतिक क्षेत्रमा महत्वपूर्ण योगदान गरेको भन्दै वरिष्ठ गायिका आले र पत्रकारिता क्षेत्रमा योगदान गरेको पुर्‍याएकोमा श्रीसलाई सम्मान गर्न लागिएको सचिव थापामगरले बताइन् ।

उत्सवलाई सफल बनाउन विभिन्न उपसमिति निर्माण गरी तयारी तीव्र पारिएको छ । कार्यक्रम गर्न १० लाख खर्च हुने अनुमान गरिएको भन्दै थापामगरले १५ लाख आम्दानी गर्ने लक्ष्य राखिएकोसमेत बताइन् ।

कार्यक्रमबाट खर्च कटाएर बचेको रकमबाट अक्षयकोष स्थापना गरी असहाय तथा विपन्न नागरिकका लागि खर्च गरिने आयोजकले जनाएको छ ।