पोखरा ।
मनाङबाट प्रतिनिधिसभा सदस्य निर्वाचित टेकबहादुर गुरुङको सांसद पद निलम्बनमा परेको छ । विशेष अदालतमा सरकारी सम्पत्ति हिनामिना गरेको अभियोग मुद्दा खेपिरहेका कांग्रेस सांसद गुरुङलाई मुद्दा किनारा नलागुञ्जेलसम्म संवैधानिक व्यवस्था अनुसारसांसद पद स्वतः निलम्बनमा परेको सांसद सचिवालयले जनाएको छ ।

गुरुङ तत्कालीन प्रधानमन्त्री सुशील कोइरालाको नेतृत्वको सरकारमा श्रम तथा रोजगार राज्यमन्त्री भएका थिए । उनले कांग्रेस माओवादीको गठबन्धनबाट चुनाव लडेर जितेका हुन् । गुरुङमाथि विशेष अदालतमा मुद्दा रहे पनि बिहीबार सांसद सचिवालयले सपथमा सहभागी गराएको थियो ।

गुरुङको सांसद पद निलम्बनमा राख्न यसअघि अख्तियार दुरुपयोग अनुसन्धान अयोगले सांसद सचिवालयलाई पत्रचार गरेको थियो । आयोगले उनीसहित १६ जनाविरुद्ध माघ २०७५ मा विशेष अदालतमा दायर गरेको मुद्दा विचाराधीन छ । उनलाई अदालतले ३१ करोड बिगो मागदाबी गरिएको छ ।