लेखनाथ ।
लेखनाथ खानेपानी उपभोक्ता संस्थाले मंगलबारबाट एएमएस प्रणाली लागू गरेको छ । संस्थाले मंगलबारबाट खानेपानी वितरण प्रणालीलाई थप व्यवस्थित बनाउनका लागि सम्पती सुव्यवस्थीत प्रणाली (एएमएस) सुरु गरेको हो ।

खानेपानी तथा ढल व्यवस्थापन बिभागको पहलमा एसियाली विकास बैंकको २ लाख डलर आर्थिक सहयोगमा संस्थाले सिस्टम प्रयोगमा ल्याएको हो ।

यो सिस्टम अन्तर्गत संस्थाले नोबेल सिस्टमले विकास गरेको जियोभ्युअर मोबाइल एप्लिकेसन प्रयोगमा ल्याउनेछ भने उपभोक्ताले खानेपानी संस्थाकै मोबाइल एप्लिकेसन प्रयोगमा ल्याउन सक्ने संस्थाका अध्यक्ष मुरारी शर्माले बताए ।

यो प्रणाली लागू भएपछि खानेपानी संस्थाको अवस्थाबारे जानकारी प्राप्त हुनुका साथै पाइपमा पानीको वहाव के कति छ, चुहावट छ छैन लगायतको विषयमा पनि जानकारी प्राप्त हुने कार्यालय प्रमुख शिवप्रसाद अमात्यले जानकारी दिए ।

उपभोक्ताले पनि अनलाइनमार्फत गुनासा राख्न सक्ने र गुनासाको सम्बोधन भयो भएन, कति समयमा हुन्छ भन्नेसमेत घरमै बसेर थाहा पाउन सक्ने छन् ।

यो प्रणालीले उपभोक्ताको समय र पैसाको बचत हुनुका साथै संस्थाप्रतिको विश्वसनीयतासमेत बढेर जाने एडिबी नेपालका नगर विकास विज्ञ शिवप्रसाद पौडेल बताउँछन् ।

खानेपानी तथा ढल निकास विभागका निर्देशक रमाकान्त दवाडीले संस्थाले प्रशंसनीय र उदाहरणीय काम गरेको बताए ।

कार्यक्रममा नेबेल सिस्टमका अध्यक्ष माइकल सामुयल, एसियाली विकास बैंकका वरिष्ठ जलस्रोत विज्ञ जियोफ्रे विल्सन, संस्थाका सचिव नारायणी भटृराई (रक्षा), उपाध्यक्ष पुष्पकमल ढुंगाना लगायतले बोलेका थिए ।