पोखरा ।
पोखराकी सौन्दर्य व्यवसायी चिनु गुरुङ राष्ट्रपति महिला उद्यमी समुन्नति पुरस्कारबाट सम्मानित भएकी छन् । महिला बालबालिका तथा ज्येष्ठ नागरिक मन्त्री सुरेन्द्रराज आचार्यले काठमाडाैंमा मंगलबार आयोजित कार्यक्रममा उनलाई सम्मान गरेका हुन् ।

गण्डकी प्रदेशबाट महिला उद्यमशीलतमा योगदान गरेकोमा उनी सम्मानित भएकी हुन् । मन्त्रालयले पाँचौँ राष्ट्रिय महिला अधिकार दिवसको अवसरमा गुरुङसहित सातै प्रदेशका महिला उद्यमीलाई १ लाख नगदसहित पुरस्कृत गरेको हो । रोजगारी सृजना, स्वरोजगार अभियान्ता, महिला उद्यमशीलता र आर्थिक समृद्धिमा योगदान पु¥याएकोमा उनीहरुलाई सम्मान गरिएको हो ।

सम्मानपछि उनले सौन्दर्य व्यवसायलाई पुस्तान्तरित व्यवसायका रुपमा विकास गरिनुपर्ने जनाइन् । उद्यम, व्यवसायले महिला सशक्तीकरणमा टेवा पुग्ने उल्लेख गर्दै उनले अबको समयमा महिला अरुको आम्दानीमा निर्भर हुनेभन्दा आफैं आयआर्जनमा लाग्नुपर्नेमा जोड दिइन् ।

२०५२ देखि सौन्दर्य कर्ममा निस्केकी उनले ३ हजारभन्दा बढी गृहिणी तथा युवायुवतीलाई तालिम दिएकी छन् । सौन्दर्यको बजारमा १ हजारभन्दा बढी अहिले तालिमपछि स्वरोजगार भएका छन् । २ हजारभन्दा बढीले स्वदेश तथा विदेशमा रोजगारी पाएका छन् ।

पोखराको पृथ्वीचोकबाट व्यवसाय सञ्चालन गरेकी चिनुले हाल गुरुङ ब्युटिपार्लर एन्ड एकेडेमी प्रालिको रुपमा पोखराकै न्युरोडमा मुख्य कार्यालय बनाएर व्यवसाय चलाएकी छन् । नेपाल घरेलु तथा साना उद्योग महासंघ गण्डकी प्रदेशको महिला अध्यक्षसमेत रहेकी उनी थुप्रै सामाजिक संघ, संस्थामा पनि आवद्ध छिन् ।