पोखरा ।
चिनिया पर्यटकले आफूहरुले चलाउने सामाजिक सञ्जाल विच्याटकै माध्यमबाट नेपालमा भुक्तानी गर्न सक्ने भएका छन् ।

नेपालमा विभिन्न डिजिटल भुक्तानी एप भए पनि विच्याटबाट भुक्तानी सम्भव थिएन । नेपालको वाणिज्य बैंक एनएमबी बैंकले विच्याटको डिजिटल वालेटबाट भुक्तानी गर्ने सेवा सरु गरेको हो । पोखरामा बिहीबार आयोजित कार्यक्रममा उक्त सेवा सुरु गरियो ।

नेपालका लागि चिनिया राजदूत छन सोङले विच्याटबाट फेवा डुंगा व्यवसायी संघलाई सहयोग रकम भुक्तानी गरी सेवा सुरुआत गरे । उक्त रकम उनले फेवातालको सरसफाइ तथा संरक्षणका लागि सहयोग गरेका हुन् । त्यस अवसरमा उनले विच्याट डिजिटल वालेटका प्रयोक्ता १ दशमलव २ बिलियन रहेको जानकारी दिए । ‘यो सेवाले चिनियाँ पर्यटकलाई नेपालमा सजिलो हुनेछ,’ उनले भने । अन्तरदेशीय भुक्तानी सेवाले दुई देशको मित्रता थप प्रगाढ हुने पनि उनको विश्वास थियो ।

डिजिटल वालेटमार्फत हुने भुक्तानीले जीवनशैली बदलिने र सुरक्षित पनि हुने उनको भनाइ थियो । चिनियाँ पर्यटकले गरेको भुक्तानी बैंकिङ प्रणालीमा जोडिनुलाई उनले सुखदको संज्ञा दिए ।

एनएमबी बैंकका प्रमुख कार्यकारी अधिकृत (सीईओ) सुनील केसीले डिजिटल भुक्तानीका लागि सन् २०१९ मै समझारी भएको स्मरण गरे । अहिल्यै नै १२ सय पेमेन्ट मर्चेन्ट बैंकसँग रहेको जानकारी उनले दिए । पोखरा महानगरपालिका मेयर धनराज आचार्यले नगद सकिएपछि डिजिटल भुक्तानी गर्न पर्यटकलाई सजिलो हुने विश्वास व्यक्त गरे । पोखरामा आउने पर्यटकमध्ये चिनियाहरुको संख्या उल्लेख्य हुने गरेको बताउँदै उनले प्याराग्लाइडिङका लागि पोखरा जान प्रेरित गरिदिन चिनियाँ अतिथिहरुलाई अनुरोध पनि गरे ।

नेपाल पर्यटन बोर्डका प्रमुख कार्यकारी अधिकृत धनञ्जय रेग्मीले बैंकिङ प्रणालीमा पर्यटकको भुक्तानी देखिँदा पर्यटनले अर्थतन्त्रमा गर्ने योगदानको सही हिसाब निस्कने अपेक्षा गरे । राष्ट्र बैंकका कार्यकारी निर्देशक गुरुप्रसाद पौडेलले दुई देशबिच अन्तरदेशीय भुक्तानीले नेपाली र चिनियाँ दुवैलाई सजिलो हुने बताए ।