लेखनाथ ।
पोखरा २७ तालचोकमा रहेको डायमन्ड माविले यस वर्षको एसइई उत्तीर्ण विद्यार्थीलाई बधाई ज्ञापनसहित सम्मान गरेको छ ।

स्कुलमा ८९ विद्यार्थीलाई शनिबार पृथ्वीनारायण क्याम्पस पोखराका पूर्व क्याम्पस प्रमुख प्राडा देवेन्द्रबहादुर लामिछाने लगायतले बधाई ज्ञापन गरे ।

प्राडा लामिछानेले अहिले तेस्रो औद्योगिक क्रान्ति सुरु भइसकेको अवस्थामा सूचना प्रविधि र कृत्रिम वौद्धिकताको विकासलाई शैक्षिक संस्थाहरुले पनि अंगीकार गर्नुपर्नेमा जोड दिए । उनले स्मार्ट एजुकेसनका लागि विद्यालयले गरेको प्रयासको प्रशंसा गरे ।

पोखरा ३२ का वडाध्यक्ष अक्कलबहादुर कार्कीले शिक्षामा राजनीतिकरण हुने गरेकोमा असन्तुष्टि जनाउँदै स्थानीय सरकार प्रमुखको हिसाबले आफूले निजी तथा सरकारी विद्यालयलाई सँगसँगै लैजाने प्रयास गरेको सुनाए । लेखनाथ उद्योग वाणिज्य संघका महासचिव उपेन्द्रराज सुवेदी ‘राजु’ले डाइमन्ड नयाँ अवधारणाका साथ अघि बढेकोमा धन्यवाद दिए ।

विद्यालयका संस्थापक प्राचार्य यमबहादुर रोकाले पछिल्लो पुस्ता प्रविधिमा अभ्यस्त हुँदै गएकाले स्मार्ट प्रविधिलाई अवलम्बन गरिएको जनाए । निर्देशक माधवशरण उपाध्यायले विद्यार्थीले हासिल गरेको उपलब्धिप्रति विद्यालय परिवार गौरवान्वित भएको सुनाए ।

विद्यालय व्यवस्थापन समिति अध्यक्ष भोजराज लामिछानेको अध्यक्षतामा भएको कार्यक्रममा अभिभावकको तर्फबाट विनोद न्यौपाने, विद्यार्थीहरुको तर्फबाट विनायक न्यौपाने, रुविना पौडेल र मयूर शाही, शैक्षिक प्रशासन प्रमुख इन्जिनियर सञ्जीव थापा, शिक्षक सविता ढुंगाना लगायतले बोलेका थिए ।

२०४५ मा स्थापना भएको डाइमन्डबाट यस वर्षको माध्यमिक शिक्षा परीक्षा (एसईई) मा शत प्रतिशत विद्यार्थी उत्तीर्ण भएका छन् ।