लेखनाथ उद्योग वाणिज्य संघको भदौ २२ र २३ गते हुने १४ औं महाधिवेशबाट नयाँ नेतृत्व चयनका लागि हरेक कार्यकारी पद वरिष्ठ उपाध्यक्षमा ऋषिराम जमरकट्टेलकाे उम्मेदवारी परेकाे छ । उनी हाडवयर व्यवसायी हुन् । जमरकट्टेल लेखनाथ हाडवयर्स एसोसिएसनका अध्यक्ष हुन् । राजनीतिक पृष्ठभूमिका जमरकट्टेल भरतकुमार अधिकारीकाे समूहबाट उम्मेदवार बनेका हुन् ।

विद्यालय तहको पठनपाठनदेखि नै समाज रुपान्तरणका लागि ज्ञान, सीप र क्षमता अनिवार्य हुनुपर्छ भन्ने मान्यता राख्दै नेपाल सरकारको जागिरसमेत छोडेर २०६२ देखि नै व्यवसायमा प्रवेश गरेको हुँ । अहिले संघको वरिष्ठ उपाध्यक्षमा उम्मेदवारी दिएको छु । संघमा २०७२ देखि अनवरत रुपमा बिभिन्न उपसमितिमा बसेर काम गर्दैको अनुभवले खारिदै कार्यसमिति सदस्य, एक पटक महासचिव पदमा समेत उपविजेता भए पनि संघप्रतिको मेरो लगावलाई देखेर अग्रजको अनुरोध र आम व्यवसायीको प्रतिनिधित्व गर्दै चुनावी मैदानमा होमिएको छु ।

जब म नेपाल जेसिजमा लागें, त्यहाँबाट धेरै सिक्ने अवसर पाएँ । विदेशमा समेत गएर तालिम लिने अवसर आयो । ती तालिमबाट सिकेका कुरालाई व्यवहारमा उतार्दै समाज रुपान्तरणका लागि लाग्नु पर्छ भन्ने मान्याताले संघमा आवद्ध आम व्यवासीलाई प्रशिक्षणको माध्यवाट क्षमता अभिवृद्धि गर्नुपर्छ भन्दै मेरो पहिलो योजना विज्ञता हस्तान्तरण छ । जे गरिन्छ, त्यसमा पूर्ण ज्ञान हुनु पर्छ । त्यसैले संघमा आवद्ध १ हजार ८ सय ६६ व्यवसायीलाई आफ्नै स्रोत र साधनबाट सूचना एवम प्रविधिबारे तालिम दिनका लागि छुट्टै टे«निङ सेन्टरको विकास गरी स्थानीय तह र व्यवसायीको टे«निङ हब आवश्यक देखेको छु ।

संघमा काम गर्ने कुनै अध्यक्ष वा उपाध्यक्षहरुले मात्र होइन, यो त टिममा गर्ने हो । हाम्रो टिमले अगाडि सारेका योजनालाई मुर्त रुप दिन जहिले पनि म कटिबद्ध हुनेछु । व्यवसायी र समाजको आवश्यकता बमोजिम तीनै तहका सरकार र महासंघसँग समन्वय गरी नयाँ परियोजना सञ्चालनदेखि बजार व्यवस्थापन समितिलाई सक्रिय बनाएर वर्षमा ४/५ पटक विविध विषयमा विज्ञबाट प्रशिक्षण तथा विचार गोष्ठी गर्ने मेरो योजना छ ।

म २०८०–२०८२ को कार्यकालमा अध्यक्षको सारथि भएर काम गर्ने छु भने २०८२–२०८४ को कार्यकाललाई लेखनाथ उद्योग वाणिज्य संघकै इतिहासमा स्वर्णम अक्षरले लेखिने गरी काम गर्न मानसिक रुपले तयार छु ।