पोखरा ।
नेपाली कांग्रेसको गण्डकी प्रदेशको पदाधिकारी सम्मेलन पुस ३ र ४ गते हुने भएको छ । यसअघि भदौ १६ र १७ गते गर्ने भनिएको प्रदेश सम्मेलन पार्टी सभापति शेरबहादुर देउवाले नभ्याउने भएपछि सरेको थियो । सम्मेलन पोखरा सभागृहमा हुने कांग्रेस गण्डकी प्रदेशले जनाएको छ ।

सम्मेलनमा ४५० भन्दा बढी प्रतिनिधि सहभागी हुने अपेक्षा गरिएको छ । २०७२ सालपछिको संघीयता आएपछि कांग्रेसले पहिलो पटक प्रदेश सम्मेलन गर्दैछ । नेपाली कांग्रेसका अनुसार मधेश प्रदेश सम्मेलन पुस ५ र ६ गते, बागमतीको पुस ७ गते, कोशीको पुस ९ गते र लुम्बिनीको मंसिर १६ र १७ गतेका लागि तय भएको छ । कर्णाली र सुदूरपश्चिमको सम्मेलन भने टुंगो लागेको छैन ।

गण्डकी प्रदेशको सम्मेलनको उद्घाटन पार्टी सभापति शेरबहादुर देउवाले गर्ने तालिका छ । प्रदेशले गरेका कामहरू आदानप्रदान गर्ने उद्देश्यले सम्मेलनको आयोजना गरिएको थियो । सम्मेलनले प्रदेशहरूको समन्वयात्मक भूमिका बढाउने विश्वास कांग्रेसको छ ।