समाधान संवाददाता
पोखरा

पोखरा महानगरपालिका वडा नम्बर २० ले वडाभित्र रहेका अति विपन्न किसानलाई सहयोग वितरण गरिएको छ । १ सय ३४ किसानलाई कृषि सामाग्री वितरण गरिएको हो ।

वडा स्तरीय बजेट १० लाखमध्ये पशुपालकलाई ५लाख र खेतीपाती गर्नेलाई ५ लाखका सामग्री वितरण गरिएको हो । कृषितर्फ ७७ र पशुपालकतर्फ ५७ किसानले सहयोग पाएका हुन् ।

किसानलाई आधुनिक पद्धतिबाट खेतीपाती गर्न हाते ट्रयाक्टर, टनेल प्लास्टिक, असिना जाली, फलामे हलो जस्ता सामाग्री वितरण गरियो । किसानले सामग्रीसँगै प्रांगारिक तथा गड्यौला मल बनाउने तालिम र बेमौसमी तरकारी खेती तालिम पनि पाएका छन् । पोखरा महानगरपालिकाका मेयर मानबहादुर जिसीले महानगरभित्र उत्पादन भएका कृषि उपज महानगरकै सम्पदा भएको बताए ।

वडाले ७ थान हाते ट्याक्टर वितरण गरेको छ । देउराली अर्गानिक सहकारी र पीपलडाली सहकारीलाई १÷१, महेन्द्र मावि वाली विज्ञान अध्यापनका लागि १, र मौजा र भलाममा गरी ४ थान हाते ट्याक्टर प्रदान गरिएको छ । यसरी वितरण गरिएका सामग्री वरपरका अन्य किसानले पनि उपयोग गर्न सक्ने वडाध्यक्ष सीम गुरुङले बताए ।

वडाले २५ जना किसानलाई प्लास्टिक टनेल, २५ जनालाई असिना जाली र २० जनालाई फलामे हलो दिएको छ । पशुपालनतर्फ ४३ विपन्न वर्गका किसानलाई कुखुराका चल्ला वितरण गरियो । एउटा फर्मलाई कुखुरा फर्म सुदृढीकरण, २ किसानलाई उन्नत जातको बोका खरिदका लागि अनुदान दिइएको छ । ३ जना पशुपालकलाई चाप कटर घाँस काट्ने मेसिन, ३ कृषकलाई गोठ सुधारका लागि अनुदान, २ कृषकलाई खोर सुधार, प्रजनन योग्य उन्नत जातको रागो खरिदका लागि २ कृषकलाई अनुदान दिइएको छ । डिपिङ ट्यांक खरिदका लागि समेत वडाले सहयोग गरेको छ ।

विभिन्न समिति निर्माण गरी परम्परागत कृषि प्रणालीलाई विस्थापन गर्ने गरी विपन्न किसानलाई सहयोग गरिएको वडाध्यक्ष गुरुङले जानकारी दिए ।