पोखरा ।
पोखराको नयाँ बजारस्थित अटोवेज विल्डिङमा एथर इलोक्ट्रिक स्कुटरको सोरुम खुलेको छ । एथरका लागि पोखरा क्षेत्रको आधिकारिक बिक्रेता अटोवेज प्रालिले एथरलाई पोखरामा भित्र्याएको हो ।

शनिबार सोरुम उद्घाटन गर्दै अटोवेज विल्डिङबाट एथर शोरुम (एक्सपेरियन्स सेन्टर) र एथर स्कुटरको बिक्री सुरु भएको प्रालिका निर्देशक तथा प्रमुख कार्यकारी अधिकृत सन्ध्या पौडेलले जानकारी दिइन् । उनले अटोवेजको लामो यात्राकै क्रमा एथर जोडिन पुगेको बताइन् ।

पछिल्लो समय धेरैले रुचाएको एथरले पछिल्लो जीवन शैलीलाई बुझेर इलेक्टोनिक स्कुटर बनेको उनको भनाइ छ । बिक्री पछिको सेवालाई प्राथमिकतामा राख्दै चाउथेमा सर्भिस सेन्टर स्थापना भइरहेको निर्देशक पौडेलले जानकारी दिइन् ।

‘सर्भिस सेन्टर निर्माण कार्य भइरहेको छ । १ महिनाभित्र तयार हुन्छ,’ उनले भनिन् । एथर पोखरामा अहिले ३ वटा मोडलमा उपलब्ध छ । एथरको सफल मोडल ‘४५० एक्स’ दुई फरक ब्याट्री अप्सनमा नेपालमा उपलब्ध छ । जसमा २.९ किलोवाट आवर र ३.७ किलोवाट आवरका २ ब्याट्री छन् ।

एथर ‘४५० एक्स’ अविश्वसनीय फिचरको कारण चर्चामा रहेको इलेक्ट्रिक स्कुटर हो । यसमा पार्किङ एसिस्ट, अटो होल्ड, फलसेफ, गुगल म्याप जोडिएको ७ इन्चको टिएफटी डिस्प्ले जस्ता फिचर उपलब्ध छन् । भारतीय बजारमा छोटो समयमै चर्चित बनेको एथर नेपालमा पनि ग्राहकको रोजाइमा पर्न अटोवेजको अपेक्षा छ ।

एथर स्कुटरको नेपालका लागि एकमात्र आधिकारिक बिक्रेता वैद्यज इनर्जी झम्सिखेलमा छ । झम्सिखेलको सोरूमलगत्तै पोखरामा पनि एथरको सोरूम (एक्सपेरियन्स सेन्टर) सञ्चालनमा ल्याइएको निर्देशक पौडेलले बताइन् । सोरूमसँगै फास्ट चार्जरसमेत यहाँ राखिएको छ ।