पोखरा ।
पोखराको सेती नदीमा फागुन १३ गते आइतबार राति माछा मार्न जाँदा बेपत्ता भएका एक जनाको खोजी गर्न सेतीको बाँध खोलिने भएको छ । आइतबार राति बेपत्ता भएका ४३ वर्षीय मानबहादुर तामाङ अझै भेटिएका छैनन् ।

जिल्ला प्रहरी कार्यालय कास्कीका प्रहरी निरीक्षक सूर्य रानाले बेपत्ता मानबहादुरको खोजीका लागि बाँध खोलिन लागेको जानकारी दिए । बाँध खोली खोजी गरिदिन अनुरोध आएकाले फागुन १७ गते बिहीबार बिहान ८ बजे पोखरा–१६, दीपमा रहेको ड्याम खोलिने भएको हो ।

ड्याम खोल्दा नदीको सतह बढ्ने भएकाले नदी वरिपरि काम गर्दा र आवतजावत गर्दा सतर्कता अपनाउन प्रहरीले आग्रह गरेको छ । आइतबार राति बेपत्ता भएका २ जनामध्ये एक जनाको शव सोमबार बिहान फेला परेको थियो ।

आइतबार राति पौने १० बजेतिर पोखरा महानगरपालिका वडा नम्बर १७ र १५ को बिचमा पर्ने सेतीको खोंचमा माछा मार्न गएका दुई जना चिप्लिएर बेपत्ता भएका थिए ।

नेपाल प्रहरी र सशस्त्र प्रहरीको संयुक्त उद्धार टिमले सोमबार पोखरा–१, कसेरीका ४० वर्षीय मंगा तामाङको शव ढुंगामा अड्किएको भेट्टाएको थियो । माछा मार्न गएका ५ जनामध्ये तीन जना सकुशल छन् ।