काठमाडौं ।
अस्ट्रेलियाली पर्वतारोही एली पेपरले बिनाअक्सिजन अन्नपूर्ण हिमाल आरोहण गर्ने भएकी छन् । काठमाडौँमा हालै आयोजित पत्रकार सम्मेलनमा पेपरले विश्वको १०औँ अग्लो (८,०९१ मिटर) उचाइको अन्नपूर्ण–१ को आरोहण गर्न लागेकी बताइन् । उनले कपनको सेभेन समिट ट्रेक्समार्फत बिनाअक्सिजन अन्नपूर्ण हिमालको आरोहण गर्न लागेकी हुन् ।

उनले अक्सिजनको प्रयोग नगरी यही वसन्त ऋतुमा अन्नपूर्ण–१ हिमाल आरोहण गर्न लागेकी हुन् । सन् २०२६ भित्र विश्वका आठ हजार मिटर अग्ला १४ वटा हिमाल बिनाअक्सिजन आरोहण गर्ने पूर्वगाइडसमेत रहेकी एलीको लक्ष्य छ ।

४८ वर्षीया पेपरले महिलालाई आफ्नै चुनौती पार गर्दै त्यसलाई जित्न प्रोत्साहित गर्ने लक्ष्य राखेकी बताइन् । ‘मेरो आफ्नै आरोहण शैलीका कारण मैले तोकेको समयमा नै आफ्नो लक्ष्य हासिल गर्ने कुरामा म विश्वस्त छु,’ उनले भनिन् । यो वसन्त ऋतुमा नेपालको अन्नपूर्ण–१ सहित अन्य तीन वटा हिमाल आरोहण गर्ने योजना रहेको उनले बताइन् ।