पोखरा ।
पोखरा विश्वविद्यालय स्कुल अफ बिजनेसमा सञ्चालित उद्यमशीलता सहायता कार्यक्रम अन्तर्गत विद्यार्थीलाई सहायता रकम हस्तान्तरण गरिएको छ । स्कुल अफ बिजनेसले ३ वटा व्यावसायिक योजनाका लागि विश्वविद्यालय अनुदान आयोगमार्फत् प्रदान गरिएको रकम सम्बन्धित विद्यार्थीलाई वितरण गरेको हो ।

विश्वविद्यालयका उपकुलपति प्राडा प्रेमनारायण अर्याल, रजिस्ट्रार प्राडा दीपकबहादुर भण्डारी, व्यवस्थापन संकायका डीन डा दयाराज ढकाल, स्कुल अफ बिजनेसका निर्देशक डा श्रृजन ज्ञवालीसमेतको उपस्थितिमा विद्यार्थीसँग अनुदान सम्झौता भएको थियो । त्यस अवसरमा विद्यार्थीका अभिभावकसमेत उपस्थित भएका थिए ।

आयोगमा नै भएको अन्तिम प्रस्तुतीकरणबाट छनोट भएका ३ व्यावसायिक योजनालाई सहायता गरिएको हो । साहिल काफ्लेको टायर रिसाइक्लिङ फ्याक्ट्रीलाई ४० लाख, रमिन घिमिरेको केराको बोक्राबाट हस्तकला बनाउने ‘अस्वस्थामा’का लागि ४० लाख र बिना शर्माको थेफ्टी हेभनका लागि १५ लाख प्रदान गरिने भएएको हो ।

विद्यार्थीहरुलाई पहिलो किस्तावापत् सोमबार ६० प्रतिशत रकम दिइएको छ । विद्यार्थीले पाएको अनुदान रकममा ४ वर्षसम्म ब्याज लाग्दैन । त्यस अवधिभित्र उनीहरुले रकम फिर्ता गरेपछि नयाँ उद्यमीलाई प्रदान गरिने छ ।

स्कुल अफ बिजनेसले व्यावसायिक योजना निर्माण तथा सञ्चालनसम्बन्धी नन क्रेडिट कोर्स निर्माण गरी ५ दिने तालिम दिएको थियो । तालिमपछि माग गरिएका व्यावसायिक योजनामध्ये पहिलो चरणको प्रस्तुतीकरण गराई ५ वटा व्यावसायिक योजना छनोट गरी विश्वविद्यालय अनुदान आयोगमा पठाइएको थियो ।

विश्वविद्यालयले उद्यमशीलता सहयोग कार्यक्रम चलाइरहेको छ । विद्यार्थीका व्यावसायिक योजना छनोटका लागि बलराम भट्टराईको संयोजकत्वमा एउटा समिति थियो । समितिले सिफारिस गरेका ५ विद्यार्थीका व्यावसायिक परियोजनामध्ये विश्वविद्यालय अनुदान आयोगबाट ३ वटा छनोटमा परेका थिए ।