कास्की ।
कास्की जिल्लाको मादी गाउँपालिका ८, नागीधारमा महिलाहरुको क्षमता बढाउने उद्देश्यले सञ्चालित ३ दिने उद्घोषण तथा नेतृत्व विकास तालिम शुक्रबार सम्पन्न भएको छ ।

तालिमको समापन समारोहमा बोल्दै वडा नम्बर ८ का अध्यक्ष प्रेमबहादुर गुरुङले महिलाहरुको अन्तर्निहीत क्षमतालाई उजागर गर्दै नेतृत्वको विकास गराउन तालिम निकै प्रभावकारी भएको बताए ।

यसअघि तालिमको उदघाटन समारोहमा बोल्दै मादी गाउँपालिकाकी उपाध्यक्ष कल्पना गुरुङले महिला दलित लगायतका लक्षित वर्गको सशक्तीकरणका लागि मादी गाउँपालिकाले विशेष महत्व दिएको बताएकी थिइन् ।

वडा नम्बर ८ की सदस्य मनकुमारीको अध्यक्षतामा सम्पन्न समापन समारोहमा वडा सदस्य लालबहादुर गुरुङ, वडा सचिव सरोज थापाले लगायतले पनि मन्तव्य राखेका थिए ।

वडा कार्यालयको हलमा सञ्चालित तालिममा सञ्चारकर्मी गोविन्द थापा सिञ्जालीले सहजीकरण गरेका थिए । तालिममा ८ नम्बर वडाका विभिन्न टोलका ४५ जना महिलाहरुले सहभागिता जनाएका थिए ।

सहभागी प्रशिक्षार्थीहरुले समापन समारोहको कार्यक्रम सञ्चालन गर्नुका साथै तालिमका अनुभव पनि बाडेका थिए ।