समाधान संवाददाता
स्याङ्जा

५० वर्ष पुरानो जीर्ण भवनबाट सेवा दिँदै आएको जिल्ला प्रशासन कार्यालय स्याङ्जाले नयाँ भवनबाट सेवा दिन थालेको छ । सहरी विकास तथा भवन निर्माण विभाग डिभिजन कार्यालय कास्कीको प्राविधिक सहयोगमा प्रशासन कार्यालय भवन निर्माण गरिएको हो । यसअघि २०२७ सालमा बनेको पुरानो भवनमा सेवा प्रदान गरिन्थ्यो ।

२०७४ वैशाखबाट जोशी फुलजोर जेभी बिजुली बजार काठमाडौंले भवन निर्माण थालेको थियो । भ्याट तथा कन्टिजेन्सीबाहेक ४ करोड ४५ लाख २१ हजार ९ सय ७९ रुपैया ९९ पैसामा भवन बनाएको फुलजोरका निर्माण व्यवसायी एनपी खनालले बताए । ३ तला भएको नयाँ भवनमा १ हलसहित २४ कोठा छन् । पहिलो तला अपांगमैत्री बनाइएको छ । पहिलो तलामा शारीरिक अपांगता भएका व्यक्ति ह्विलचियरमा सेवा लिन सक्ने गरी बनाइएको जिल्लाको पहिलो कार्यालय हो ।

३ सय ७२ दशमलव ५६ वर्गमिटरमा भवनसँगै ग्यारेज, क्यान्टिन र शौचालय निर्माण गरिएको छ । भवन निर्माण सम्झौता गरी २ महिना ढिला काम थालेको फुलजोरले सम्झौताको काम सक्ने समयभन्दा २ महिना ढिला निर्माण सम्पन्न गरेको हो । गत मंसिरमा काम सक्ने लक्ष्य लिए पनि भवन बनाउने सामग्री तथा रकम अभावले थोरै ढिलाइ भए पनि अन्य भवनको तुलनामा काम छिटो सकिएको खनालले बताए ।

पुरानो भवन जीर्ण भए पछि पानी चुहिँदा कामकाज गर्न र तथ्यांक सुरक्षित गर्न समस्या भएको थियो । स्याङ्जा प्रशासनमा ५ लाख नागरिकता र १ लाख पासपोर्टको तथ्यांक छ । प्रजिअ कोशहरि निरौलाले हेल्प डेस्क र छुट्टा छुट्टै विभाग रहने गरी मिलाउने काम गरिएको जानकारी दिए । प्रजिअ निरौलाका अनुसार पहिलो तलामा हेल्प डेस्क, दर्ता÷चलानी, प्रशासन कक्ष, राहदानी कक्ष, नागरिकता फाँट, प्रशासन, राष्ट्रिय परिचयपत्र कक्ष तथा प्रमुख प्रसासकीय अधिकृत कक्ष राखिएको छ ।

दोस्रो तलामा प्रजिअ कक्ष, सहायक प्रजिअ कक्ष, इजलास, आर्थिक प्रशासन कक्ष र राष्ट्रिय अनुसन्धान कार्यालय राखिएको छ भने तेस्रो तलामा सभाहल छ ।

नागरिकता फाँट र पुराना नागरिकता र राहदानीको तथ्यांकबाहेक सबै नयाँ भवनमा सारिएको बताउँदै प्रजिअ निरौलाले बाँकी रहेका सबै फाँट साउनभित्र सारिसक्ने जानकारी दिए । तत्कालीन प्रजिअ हरिप्रसाद पन्थीको पहलमा भवन निर्माण थालिएको थियो ।