पोखरा ।
आन्तरिक राजस्व कार्यालय पोखराले आर्थिक वर्ष २०८०/०८१ मा अघिल्लो आर्थिक वर्षभन्दा सात प्रतिशत बढी राजस्व संकलन गरेको छ । अघिल्लो आर्थिक वर्ष पाँच अर्ब २२ करोड राजस्व संकलन भएकोमा गएको आर्थिक वर्ष पाँच अर्ब ५७ करोड ५५ लाख राजस्व असुली भएको हो ।

कार्यालयका सूचना अधिकारी कर अधिकृत गोपाल गिरीले निर्धारित वार्षिक लक्ष्य छ अर्ब ३९ करोड ४७ लाखको ८७ दशमलव एक नौ प्रतिशत प्रगति भएको जानकारी दिए । आर्थिक वर्ष २०७९/०८० को भन्दा ३४ करोड ९५ लाख बढी राजस्व संकलन भएको छ ।

कार्यालयले आर्थिक वर्ष गएको आर्थिक वर्ष आयकरतर्फ ३ अर्ब ६६ करोड ८७ लाख, मूल्य अभिवृद्धि करतर्फ एक अर्ब ७३ करोड ३६ लाख र अन्तःशुल्कतर्फ १६ करोड ६७ लाख राजस्व संकलन गरेको छ ।

यो कार्यालयको कार्यक्षेत्रमा कास्कीका पोखरा महानगरपालिका, अन्नपूर्ण गाउँपालिका, माछापुच्छ्रे गाउँपालिका, रुपा गाँउपालिका र मादी गाउँपालिका छन् भने स्याङ्जाको पुतलीबजार नगरपालिका, भीरकोट नगरपालिका, वालिङ नगरपाालिका, गल्याङ नगरपालिका, चापाकोट नगरपालिका, फेदीखोला गाउँपालिका, आँधीखोला गाउँपालिका, विरुवा गाउँपालिका, अर्जुनचौपारी गाउँपालिका, हरिनास गाउँपालिका र कालीगण्डकी गाउँपालिका पर्छन् ।