पोखरा । गण्डकी प्रदेश नीति तथा योजना आयोगले पूर्णता पाएको छ । बुधबार दिउँसो बसेको बैठकले नवलपुरका दीपक भण्डारीलाई सदस्यमा नियुक्त गर्ने निर्णय गरेसँगै आयोगले पूर्णता पाएको हो । उनी राप्रपाको कोटाबाट नियुक्त भएका हुन् । उनको नियुक्तिले गण्डकीमा एमाले भने झस्किएको छ । केन्द्रमा सत्ता समीकरण फेरिएसँगै गण्डकीमा पनि त्यहि अनुसार हुने बताइए पनि मुख्यमन्त्री पाण्डेले धमाधम नियुक्तिका निर्णय गर्दा एमाले झस्किएको हो ।

नवलपुरको कावासोती नगरपालिका ७ का भण्डारी ग्रामीण विकासमा स्नातकोत्तर हुन् । उनीसँग मध्यविन्दु बहुमुखी क्याम्पसमा पढाएको अनुभव छ ।

यसअघि पाण्डे सरकारले आयोग सदस्यमा असार २१ गते नेपाल समाजवादी पार्टीको कोटाबाट माया तिम्सिनालाई नियुक्त गरेको छ ।

उपाध्यक्षमा जेठ १७ गते गोरखाका डा कृष्णचन्द्र देवकोटा नियुक्त भएका थिए ।