हेमजा ।
पोखरा महानगरपालिका वडा नम्बर २५ को सेवा नयाँ प्रशासनिक भवनबाट सुरु भएको छ । पहिला सेवा दिँदै आएको कार्यालयबाट सेवा दिन कठिनाइ भएको हँुदा नयाँ कार्यालयबाट सेवा दिन लागिएको हो । पहिला सेवा दिँदै आएको कार्यालयमा भवन साँघुरो थियो । पार्किङको पनि समस्या थियो । आइतबारदेखि सेवा सुरु गरिएको कार्यालयमा फराकिलो तथा राम्रो पार्किङ रहेको वडा अध्यक्ष मोतीलाल तिमिल्सिनाले जनाए । वडा कार्यालय साविक ग्रामप्रकाश आधारभूत विद्यालयको भवनमा सारिएको छ ।

पोखरा महानगरपालिकाका प्रमुख धनराज आचार्यले भूगोलको हिसाबले पोखरा ठूलो महानगरपालिका भएको बताउँदै जनसंख्या पनि धेरै भएको उल्लेख गरे । पोखरा महानगरपालिकाका उपप्रमुख मञ्जुदेवी गुरुङले सेवा शुभारम्भ गरेकोमा बधाई दिँदै वडा कार्यालयबाट सेवाग्राहीको काम सहज तरिकाले गर्नुपर्ने बताइन् । कार्यक्रममा वडा नम्बर २ का अध्यक्ष दिवसमान प्रधानांग, साविक हेमजा गाविसका अध्यक्ष रामचन्द्र त्रिपाठी र गौरीशंकर माविका अध्यक्ष भोजराज पौडेलले पनि बोलेका थिए ।

कार्यक्रममा गौरीशंकर माविका अध्यक्ष भोजराज पौडेल, गौरीशंकर माविका प्रअ अम्बर कुँवर, साविक ग्रामप्रकाश आविका अध्यक्ष दलबहादुर कुँवर, प्रअ मनोहरि तिमिल्सिना लगायतलाई सम्मान गरिएको थियो । वडा अध्यक्ष मोतीलाल तिमिल्सिनाको अध्यक्षतामा भएको कार्यक्रममा स्वागत वडा सदस्य धनकुमारी पोखरेल तिमिल्सिनाले र सञ्चालन सूचना अधिकारी ईश्वरी बाँस्तोलाले गरेकी थिइन् ।