पोखरा ।

नेपालको शेयर बजारको इतिहासमा आज अल टाइम हाईको नयाँ किर्तिमान बनेको छ । यो हो सबैभन्दा बढी कारोबार भएको दिन । नेपालमा शेयर बजारको कारोबार भएदेखि अहिलेसम्म आज जति धेरै रकमको शेयर खरिद बिक्री भएको थिएन् ।

आज एकै दिनमा २१ अर्ब ९१ करोड १५ लाख ३ हजार १६१ रुपैयाँ बराबरको शेयर कारोबार भएको हो । यसभन्दा पहिले २०७८ साउन ३१ गते २१ अर्ब ५३ करोड रुपैयाँ बराबरको शेयर खरिद बिक्री भएको थियो ।

आज परिसूचक नेप्से ६४.२५ अंकले वृद्धि भएर २७६०.९० अंक पुगेको छ । आज १९१ वटा कम्पनीको शेयर मूल्य वृद्धि भएको छ । भने, ४४ वटा कम्पनीको शेयर मूल्य घटेको छ । आज ५ करोड ९ लाख ६७ हजार ९८१ कित्ता शेयर करोबार भएको छ ।

पछिल्लो समयमा नयाँ गठबन्धनको सरकार बनेपछि निरन्तर शेयर बजार उकालो लागेको छ । कांग्रेस एमाले गठबन्धनको सरकार बन्ने र अर्थमन्त्री एमालेका विष्णु पौडेल हुने भएपछि उकालो लागेको शेयर बढेको बढ्यै छ । मौद्रिक नीति आएपछि झनै उत्साही बनेका शेयर खरिदकर्ताले बजारमा मनग्गे पैसा खन्याएका छन् ।