पोखरा ।
महिला तथा बालबालिकाको क्षेत्रमा कार्य गर्दै आएको वुमन एक्ट नेपालले गण्डकी प्रदेशका महिला उद्यमीका लागि अभिमुखीकरण कार्यक्रम गरेको छ । नेपालका सीमान्तकृत र जोखिममा परेको महिला तथा बालबालिकाको आर्थिक सबलीकरण परियोजना अन्तर्गत गण्डकीका प्रदेशका महिला उद्यमीको सशक्तीकरण गर्न र उद्यमका लागि सहजीकरण गर्न शुक्रबार अभिमुखीकरण आयोजना गरिएको हो ।

कार्यक्रममा गण्डकी प्रदेशका सामाजिक विकास तथा स्वास्थ्य मन्त्री बिन्दुकुमार थापाले महिलालाई उद्यमी बनाउनेतर्फ अबको बाटो हुनुपर्नेमा जोड दिए । उनले यसले महिलालाई आत्मनिर्भर बनाउने बताए । उनले आफू पनि उद्यमी पृष्ठभूमिबाट आएकै कारण उद्यमीहरुको समस्या बुझ्ने उनको भनाइ छ ।

वुमन एक्टकी कार्यकारी अध्यक्ष सिर्जना अधिकारीले आर्थिक उपार्जनका लागि ससाना व्यवसाय गरिरहेका महिला उद्यमीले व्यवसाय दर्ता नगरिदिंदा सरकारबाट प्राप्त हुन सक्ने आर्थिक सहयोग, कार्यक्रम, सूचनाबाट वन्चित भइरहेको सुनाइन् । यसप्रति महिला उद्यमीलाई सशक्त बनाउने कार्यका लागि परियोजना अघि बढिरहेको उनको भनाइ छ ।

भेलाले पोखरा महानगर, माछापुच्छ्रे गाउँपालिका र हुप्सेकोट गाउँपालिकाका महिला उद्यमी सम्मिलित ५ सदस्य प्रदेशस्तरीय महिला उद्यमीको सामुदायिक अभ्यास सञ्जालसमेत गठन गरेको छ । सञ्जालका संयोजकमा उर्मिला विक, उपसंयोजक रेवती सारु, सचिव तुलसी अधिकारी, सदस्यमा यशोदा लम्साल र पुष्पा गुरुङ छन् ।

सञ्जालले स्थानीय र प्रदेश स्तरमा समन्वय गरी उद्यमी महिलाको हकहितमा वकालत गर्ने वुमन एक्टका टिम लिडर प्रकाश अधिकारीले बताए । वुमन एक्टले बाग्मती, गण्डकी, मधेस, लुम्बिनी र सुदुरपश्चिम प्रदेशका २५ स्थानीय तहमा परियोजना सञ्चालन गरिरहेको छ ।