पोखरा ।
उद्योग व्यवसायको प्रवद्र्धन गर्ने सन्दर्भमा पोखरा महानगरपालिका आर्थिक विकास महाशाखा अन्तर्गतका व्यवसाय प्रवद्र्धन केन्द्रले उद्योगी व्यवसायीसँग अन्तक्र्रिया गरेको छ ।

कार्यक्रममा पोखरा चेम्बर अफ कमर्स कास्कीको तेस्रो अधिवेशनबाट निर्वाचित पदाधिकारी तथा कार्यसमितिका सदस्यलाई सम्मान समेत गरिएको व्यवसाय प्रवद्र्धन केन्द्रका प्रमुख कार्यकारी अधिकृत नवराज अधिकारीले जानकारी दिए ।

कार्यक्रममा महानगरका आर्थिक विकास महाशाखा प्रमुख मनोहर कडरियाले स्थानीय उत्पादन, सीप र क्षमतालाई अभिवृद्धि गरी रोजगार सिर्जना गर्न सके समग्र आर्थिक क्षेत्रलाई चलायमान बनाउन सकिने बताए । उनले महानगरले व्यवसाय प्रवद्र्धन केन्द्र मार्फत युवालाई स्वरोजगार र उद्यमी बनाउन विभिन्न किसिमको सीपमुलक तालिम दिएको जानकारी दिए ।

पोखरा चेम्बर अफ कमर्स कास्कीका अध्यक्ष उमराज बास्तोलाले उद्योग व्यवसायको प्रदद्र्धन र रोजगारी सिर्जना गर्ने सवालमा सहकार्य गर्ने उल्लेख गरे । उनले सरोकारवाला सबै क्षेत्रको समन्वय र सहकार्यबाट मात्र वर्तमान आर्थिक संकटको हल गर्न सकिने चर्चा गरे । ‘उद्यमशिलताको माध्यमबाट उद्योग व्यवसायको प्रवद्र्धन गर्न सकिन्छ,’ उनले भने, ‘नागरिक स्तरमा उद्यमशीलताको विकास भए आर्थिक समृद्धि सम्भव हुन्छ ।’

व्यवसाय प्रवद्र्धन केन्द्रका प्रमुख कार्यकारी अधिकृत अधिकारीले केन्द्रले बजारमा माग भएको रोजगारका लागि लामो अवधिको प्रशिक्षण दिदै आएको जानकारी दिए । केन्द्रले रोजगार प्रवद्र्धनका लागि आवश्यकता अनुसारको तालिम दिने र रोजगार खोज्ने सम्मको तहमा पुर्‍याउने उल्लेख गर्दै उनले प्रशिक्षार्थी उद्यमी बनेपछि उत्पादन गरेका वस्तुका लागि बजार खोज्न महानगरले सहयोग गरेको जनाए ।

रोजगारीको खोजीमा युवा विदेश पलायन भइरहेको अवस्थामा महानगरले व्यवसाय प्रवद्र्धन केन्द्र मार्फत स्वरोजगार अभिवृद्धिलाई लक्षित गरी विभिन्न सीपमूलक तालिमलाई प्राथमिकताका साथ अघि बढाएको छ ।