पोखरा ।

पोखराबाट काठमाडौंका लागि उडेको बुद्ध एयरको जहाज डाइभर्ट भइ भैरहवा अवतरण भएकाे छ । काठमाडौंको मौसम ठिक छ भन्दै पोखराबाट उडेको सो जहाज काठमाणडौंको मौसम खराब भएपछि ल्याण्ड गर्न पाएन । त्यो जहाज पोखरा फर्किदै गर्दा पोखराको मौसम पनि बिग्रिएको थियो । यहाँ अवतरण गर्न पनि नसक्ने भए पछि भैरहवा डाइभर्ट गरिएको हो ।

बुधबार बिहान ७२ जना यात्रु लिएर उडेको ६६४ एयर अटिआर ७२ नम्बरको जहाज मौसम खराबीका कारण अवतरण गर्न नसकी भैरहवा डाइभर्ट भएको पोखरा विमानस्थलले जानकारी दिएको छ ।

पोखरा विमानस्थलका कर्मचारीका अनुसार मौसम खराबी हुँदा बिहान ७ः२५ मा उड्ने तय भएको जहाज सवा ९ बजेमात्र काठमाडौं उठेको थियो । काठमाडौंको मौसम खराबीका कारण करिब २० मिनेर आकासमा फन्को मारेर फर्किएको जहाजलाई पोखरा पनि ल्याण्ड गराउन असम्भव भएकाले भैरहवा पठाइएको नागरिक उड्ययन प्राधिकरणका अधिकारीले जानकारी दिए ।

काठमाडौं अवतरण नभएपछि भैरहवा डाइभर्ट गरेर १०ः२० मा भैरहवामा ल्याण्ड भएको पोखरा विमानस्थलकी सूचना अधिकारी जसोदा रेग्मीले जानकारी दिइन् ।

बिहान पोखरा विमानस्थलबाट २ वटा बुद्ध एयरको जहाज काठमाडौंका लागि उडेको थियो । त्यसयता पोखरा विमानस्थलबाट कुनै पनि उडान हुन सकेको छैन ।

भिजिविलिटीका कारण उडान र अवतरण दुबै ठप्प भएको छ । अझै केहीबेर विमानस्थल खुल्ने अवस्था नरहेको बताइएको छ ।