पोखरा । क्यान्सर रोगबाट प्रभावित गोकुल रिमाललाई पोखरा ११ को रानीपौवा महिला समूहले आर्थिक सहयोग गरेको छ । महिला समूहबाट संकलित ४४ हजार ४ सय ६५ रुपैयाँ बुधबार पोखरामा एक समारोहका बिच रिमाललाई महिला समूहकी सचिव लिलादेवी पौडेल, कोषाध्यक्ष झलक अधिकारी सहितको अन्य सदस्यहरुले हस्तान्तरण गरेका हुन् ।

८१ जना महिला समूह र अन्य केही सहयोगीहरुबाट उक्त रकम संकलन भएको सचिव पौडेलले जनाइन् । रिमालको स्वास्थ्य उपचारमा थप सहयोग हुने उद्देश्यले आफूहरुले सानो सहयोग गरेको उनको भनाइ थियो । महिला समूहले न्यूनतम २० रुपैयाँदेखि ५ हजार १ सय ५ रुपैयाँसम्म प्रति व्यक्तिको सहयोगमा उक्त रकम संकलन गरेको हो । महिला समूहमा हाल ७१ जना सदस्य आबद्ध छन् ।

बर्दिया घर भई विगत डेढ दसकदेखि पोखरामा ट्याक्सी चलाउँदै आएका ४४ वर्षका रिमालको थप स्वास्थ्य उपचारको लागि सहयोगी मनहरुमा सहयोगको आव्हान समेत गरिएको संस्थाका अध्यक्ष बेबी श्रेष्ठ (गोंगजु) ले बताइन् । तेस्रो वर्षमा प्रवेश गरेको संस्थाले यसअघि आँखा शिविर, फेवाताल सरसफाई, ट्राफिक सचेतना, टोल सरसफाई, डेंगु सचेतना अभियान, गाईजात्रा तथा बाह्र भैरव नृत्यमा सहयोगसहित अन्य महत्वपूर्ण सामाजिक कार्यमा सहयोग र सहकार्य गर्दै आएको अध्यक्ष गोंगजुले बताइन् ।

रिमाललाई विगत २ महिना अघि मात्र दाँतबाट क्यान्सर रोग लागेको पहिचान भएको हो । रिमालको एउटा शल्यक्रिया भए पनि रेडियसन गर्न र किमो लगाउन करिब ५ लाख रुपैयाँ आवश्यक भएको उनले बताए । पत्नी र दुई छोरीको पालन पोषणमा ट्याक्सी हाक्दै हिड्ने गरेका रिमालले उपचारका लागि थप सहयोगको अपेक्षा गरेका छन् ।