पोखरा ।

पोखरा महानगरपालिका वडा नं ६ बैदाम निवासी लोकराज पहारी किसान संघको केन्द्रीय सदस्य मनोनित भएका छन् । नेपाली कांग्रेसका सभापति शेरबहादुर देउवाले उनलाई किसान संघमा मनोनित गरेको मंगलबार जारी विज्ञप्तिमा उल्लेख छ ।

पहारी ताल वाराही माध्यमिक विद्यालयमा नेविसंघको संस्थापक सभापति थिए । उनी सोही विद्यालयका पूर्व शिक्षक तथा नेपाल शिक्षक संघ कास्कीका आजीवन सदस्यसमेत हुन् । पहारी पोखरा ५ स्थित धर्मस्थली आधारभूत विद्यालयका पूर्व प्रधानाध्यापक हुन् ।

हाल नेपाली कांग्रेस वडा इकाइ ६ बैदामका क्षेत्रीय प्रतिनिधिसमेत रहेका पहारी नेपाल किसान संघ कास्कीको पूर्वअध्यक्ष, क्षेत्रीय अध्यक्ष हुँदै केन्द्रीय सदस्य बनेका हुन् । उनी राजनीतिकसँगै विभिन्न सामाजिक, शैक्षिक क्षेत्रमा सक्रिय छन् । लामो समय राजनीति गरे पनि उनी लाभको पदमा भने पुगेका छैनन् ।

पहारीले एमनेस्टी इन्टरनेसनल ८२ को संस्थापक सदस्य भएरसमेत काम गरेका थिए । उनीसँगै कास्कीकै लेखबहादुर गुरुङ, लमजुङका गणेश चिलवाल र बुद्धिबहादुर गुरुङ, स्याङ्जाका पवन नेपाल र भोजराज गुरुङसहित ५१ जना संघको केन्द्रीय सदस्यमा मनोनित भएका छन् ।