पोखरा ।
तीज २०८१ को अवसरमा रेडियो जननीले ’जननी तीज संवादः उद्यमीका आवाज’ नामक सांस्कृतिक कार्यक्रम गर्ने भएको छ ।

तीजलाई आर्थिक सशक्तीकरणसँग जोड्दै उद्यमशील समाज बनाउने उद्देश्यसहित कार्यक्रम गर्न लागेको अध्यक्ष हीरा भट्टराईले बताइन् । भदौ १५ गते हुने कार्यक्रमले महिला उद्यमशीलता, स्वतन्त्रता, र समानताको महत्वलाई उजागर गर्ने उनको भनाइ छ ।

रेडियोकी प्रस्तोता एवं कार्यक्रम संयोजक जमुना वर्षा शर्माले नयाँ महिला उद्यमीलाई प्रोत्साहन गर्दै उनीहरुको प्रेरणादायी यात्रालाई प्रकाश पार्ने र समाजमा उनीहरूको योगदान उजागर गर्ने लक्ष्य सुनाइन् । कार्यक्रममा विभिन्न महिला उद्यमीका अनुभव र विचार प्रस्तुत गरिनेछ ।

कार्यक्रममा सहभागी हुनका लागि महिला उद्यमी, सामाजिक अभियन्ता लगायतलाई अनुरोध गरिएको छ । यो प्रयासले महिला उद्यमशीलता प्रवद्र्धनमा महत्वपूर्ण योगदान दिने अपेक्षा राखिएको रेडियोकी समाचार प्रमुख उमा आलेले जनाइन् ।