गण्डकी ।
नेपाली महिलाहरुको महत्वपूर्ण पर्व हरितालीका तिजमा दर खाने खर्च कटाएर यहाँको एक आमा समूहले सामुदायिक विद्यालयमा अक्षयकोष स्थापना गरेको छ । तीज पर्व होटल र पाटी प्यालेसमा भोज खाएर नभई शिक्षा क्षेत्रमा लगानी गरी मनाउने लक्षयका साथ पोखरा महानगरपालिका वडा नम्बर १७ स्थित ढुंगेसाँघु सीतापाइला आमा समूहले स्थानीय जानकी माविमा ५१ हजार १०५ रुपैयाको अध्यक्ष कोष स्थापना गरेको हो ।

विद्यालयमा आयोजित एक कार्यक्रमका बिच उक्त रकम बरावरको चेक विद्यालय व्यवस्थापन समितिलाई हस्तान्तरण गरिएको थियो । सामूहिक रुपमा दर खाने रकम संकलन गरी विद्यालयमा अक्षयकोष स्थापना गरेको समूहकी अध्यक्ष सीता काप्mलेले जानकारी दिइन् । ‘समाजका विपन्न एवं असहायको शिक्षाको अध्ययन थलो बनेको सामुदायिक विद्यालयको शैक्षिक गुणस्तरमा सहयोग पुग्ने विश्वास समुहले लिएको छ,’ उनले भनिन्, आवश्यकता अनुसार समुहले सहयोगलाई निरन्तरता दिने छ ।’

यसअघि विद्यालय सञ्चानार्थ वडा सदस्य शिवराम भण्डारीले ५ लाख रुपैयाँको अक्षयकोष स्थापना गरेका थिए । सरकारी एक वर्षको सेवा सुविधा ३ लाख र २ लाख थप गरि विद्यालयमा पाँच लाख रुपैयाँको अक्षयकोष स्थापना गरेको प्रधानाध्यापक अर्जुन कँडेलले जानकारी दिए । विद्यालय सञ्चानार्थ १ करोडको अक्षयकोष पुर्‍याउने लक्ष्यका साथ स्थापना भएको कोषमा हालसम्म विभिन्न संघसंस्था एवं व्यक्तिबाट लगभग १५ लाख संकलन भएको उनको भनाइ छ ।

कार्यक्रममा पोखरा १७ का वडासदस्य शिवराम भण्डारी, विद्यालय व्यवस्थापन समितिका सदस्य हरिप्रसाद बास्तोला, शिक्षक अभिभावक संघका अध्यक्ष विक्रम भण्डारी लगायतको सहभागिता थियो । विद्यालयका शिक्षक तुलसी गिरीका अनुसार सो विद्यालयमा हाल ३७५ जना विद्यार्थी अध्ययनरत छन् । पछिल्लो समय निजी विद्यालय छोडेर सामुदायिक विद्यालयमा पठनपाठन गर्ने क्रम बढेको छ ।